Vawiin chawhma dar 10:00 khan Mizoram district hrang hrangah National Disaster Management Authority, New Delhi leh Disaster Management & Rehabilitation Department huaihawtin Multi State Mock Exercise on Earthquake Disaster chu kan thenawm state Tripura leh Nagaland rual in kalpui a ni.
Aizawl district ah chuan Mock exercise hi Aizawl District Bawrhsap pisa atanga tan niin Siren dar 10 ah tih rik a ni a, hemi rual hian chhiatrup thlen palh a chhanchhuah leh chhawmdawl hna thawk chhuak tur sawrkar department hrang hrang a hotu te chu District Emergency Operation Centre (DEOC) ah an tlan khawm nghal a, he DEOC atang hian chhanchhuah hna thawk tura department pawimawh hrang hrang atanga din Task Force te chu an chanvo leh an thawh chhuahna tur hmun te hrilh hriat niin Mock Exercise hi kalpui nghal a ni. He mock exercise enchhinna hi Millenium Centre, Capital Complex, Republic High school leh Higher Secondary school, Sihpui Ramthar Veng leh Aizawl Civil Hospital ahte kalpui a ni a, hengte bakah hian lirnghing vanga Treasury Square a Thing tlu, Khatla a Electric ban tlu, Saron Tuithiang a inchim leh Mizofed Petrol pump a kangmei chhuak in mipui tana harsatna a thlen thenfai leh chinfel hna te tihchhinna neih a ni bawk.
Vawiin a Mock Exercise ah hian Police, MPRO, Fire & Emergency Services, Health & Family Welfare, Civil Aviation, I&PR, PHE, PWD, P&E, FCS&CA, E&F department te bakah State Disaster Response Force leh National Disaster Response Force ten chhanchhuah leh chhawmdawl hna hi an thawk a, lirnghing thlenna hmun atana ruat bik Incident site 5 te bakah hian lirnghing thlen huna chet lak zuina tur Relief camp te, damlo enkawlna tur Make shift Hospital te buatsaih a ni a, hengah te hian chhanchhuah hna thawh dan turte tih chhin a ni. Chief Minister Pu Lal Thanhawla’n mock exercise hi a enpui a, Dawrpui leh Ramthar Veng YMA ten mock exercise hi an telpui bawk.
Mock Exercise neih zawh hnu hian Aizawl District Bawrhsap Dr A Mathumma IAS chuan sawrkar department leh tlawmngai pawl hrang hrangten mock exercise kalpuina kawnga thawh hona tha an neih avangin lawmthu a sawi a, he mock exercise hian rahchhuah tha tak a neih ngei a beisei thu a sawi. Hemi hnu hian State Emergency Operation Centre kaihhruiana hnuaiah DEOC hrang hrangte nen video conference neih a ni a, mock exercise kalpui dan te thlir ho niin a tha zawk a ruahmanna kalpui dan tur te an sawi ho a ni.
