Vawiin khan Save Chite Lui Coordination Committee (SCLCC) thutkhawm hmasa ber chu Raj BhaWan Durbar Hall-ah neih a ni a. He thutkhawm hi Chief Secretary leh Coordination Committee Chairman ni bawk Pu Lalmalsawma, IAS in a kaihruai a. Mizoram Governor leh Coordination Committee Patron ni bawk Lt. Gen. Nirbhay Sharma, PVSM, UYSM, AVSM, VSM (Retd) in thurel tan hmain SCLCC member-te hnenah fuihna thu a sawi. 

Governor chuan Chite Lui chhanchhuak tura tlawmngai pawl hrang hrang hruaitute leh sorkar mi pawimawhte lungrual taka pindan khata an thukhawm thei leh Save Chite Lui Coordination Committee hnuaiah pheikhai rual taka thawkho tura an insuihkhawm thei chu ropui a tih thu a sawi a. India ram hmun tam takah lui leh dil leh tuihna humhalhna turin sorkar laipuiin cheng vaibelchhe tam tak a sen tawh hnu ah pawh a tha zawnga rahchhuah hmuh tur a awm mang lo tih sawiin Mizoramah erawh chuan khawtlang nun inkaihhruaina tha leh Kristian zirtirna avangin Chite Lui chhanchhuak tura beihna hi a hlawhtlin ngei a rin tlat thu a sawi a. Member kalkhawmte chu ngawrh lehzuala tan la tura fuihin kumin Krismas hma ngeiin Chite Lui hi lui thianghlim leh ngainatzawm zawk a nih theihna tura thawk turin a fuih a. Chite Lui chhanchhuahna tura beihnaah amah pawh a inhuam thui hle tih sawiin eng hunah pawh Coordination Committee-in mamawhna an neih chuan a inhawng reng a ni tih a sawi bawk a ni. 

He thutkhawmnaah hian Chite Lui Baseline Survey report hmasa (First Report) chu ngaihthlak leh sawiho a ni a. Baseline Survey thawktute hian Aizawl Municipal huamchina Melthum ram chuan hnuai thleng an zo tawh a, tunah hian Aizawl veng hrang hranga hnar nei Chite Lui chawmtu luite hrang hrang zirchian hna an thawk leh mek a, he hna hi thlakhat chhunga zawh tura ruahman a ni. Chite Lui hi Aizawl khawpui leh a chhehvela Damdawi In thenkhat thli (bio-medical waste) in nasa takin a tibawlhhlawh tih Baseline Survey atanga hmuhchhuah a ni a, Chief Secretary leh Coordination Committee Chairman ni bawk Pu Lalmalsawma chuan he thil hi sorkarin rang taka an lo umzui tur thu kalkhawmte a hrilh a ni. 

Thutkhawmnaah hian Save Chite Lui Coordination Committee hmalakna tur hrang hrangte sawiho a ni bawk a. Tun dinhmuna Chite Lui leh a chhehvela khawsate tana hnawksak lian ber lei laihna vung tam tak lui kama paih mek chu nasa taka dan bawhchhiatna a nih avangin dan anga ti tawp nghal turin thuneitute hnenah ngenna siam nise an ti a. Chak zawka hmalak a nih theih nan Coordination Committee Working Chairman kaihhruaina hnuaiah AMC Mayor leh Aizawl DC telna Executive Committee din a ni bawk. 

Save Chite Lui Coordination Committee thutkhawmnaah hian sorkar mi pawimawhte leh tlawmngai pawl hrang hrang hruaitute an kal tha hle a ni.