838/2022-2023

Kolasib dated 9th June 2022: Vawiin khan Dr.Hari Babu Kambhampati, Governor, Mizoram chuan Counter-Insurgency and Jungle Warfare School, Vairengte a tlawh a, Vairengtea Assam leh Mizoram inrina a CRPF duty-na hmun tlawh bawkin Sawrkar hmalakna hnuai a hmațhatna kalpui dan țhenkhat a endik. Governor hi Pu John LT Sanga, Deputy Commissioner leh Pu Vanlalfaka Ralte, SP, Kolasib ten an țawiawm a ni.

Information and Research Centre, CIJWS-ah hian Major General Rajiv Thapar, Commandant chuan CIJWS kalphung leh sipai hnen a zirtirna an pek dan tlangpui tarlanna hun a hmang a, ral lemchan entirna hun neih bawk a ni. Governor hian CRPF duty-na hmun, Ground Zero tlawhin Shri. Shah Nawaz Khan, DIG, CRPF, Silchar in a lo dawngsawng a. He hun ah hian Pu H.Lalengmawia, Commissioner, Home Department in telpuiin ram mipuite ngaihsaktu Governor Mizoramin a nei chu thlamuanthlak a tih thu leh ramri venghimtute tan pawh phurna nasa zawk a thlen ngei a beisei thu a sawi.

Governor Dr.Hari Babu Kambhampati chuan Vairengte khaw chhung a Pradhan Mantri Ujjwala Yojana kaltlanga eirawngbawlna gas connection dawngte leh Pradhan Mantri Awas Yojana hnuai a in sak țanpuina dawngte  a tlawh a, heng hamțhatna la dawng kim lote pawhin an dawn thuai a beisei thu a sawi.