Mizoram Governor Lt Gen Nirbhay Sharma, PVSM, UYSM, AVSM, VSM, (Retd) chu Secundarabad-a College of Defence Management (CDM) Annual Seminar 2016-2017 neihah Khuallian niin he hunah hian Valedictory Address a sawi.

CDM Commandant RAdm DS Couhan, NM chuan Mizoram Governor chu lawmin Defence Seminar hun a rawn hmanpui theih avangin lawmthu a hrilh a. Seminar Velidictory Address sawiin Mizoram Governor chuan sorkar laipuiin defence tihchangtlung lehzual a tum laia CDM hotuten Defence Management Seminar a huaihawt chu a lawmawm hle a ni, a ti a. Defence expenditure leh budget ngaihtuah honaah hian kan thil tum ber tur chu ram hmasawnna tho tho a ni tiin Mizoram Governor chuan defence chuan ramdangte nena kan inlaichinna leh technology lama ram hmasawnna thleng a khawih avangin a pawimawh hle a ni, a ti bawk. Ram venhim hna piah lamah defence forces hian hnathawh tam tak an nei a, ramchhung boruak hrang hrang azirin sipaite hnathawh tur a tamin a danglam thin a. Vawiin thleng hian politics-a thuneihna (political power)-ah armed forces te an inhnamhnawih ngai lova, langtlang leh fel takin a la kal zel thei hi a fakawm a ni, a ti. India chu defence lamah senso sang ber ramte zingah 5-na a ni hial tawha sawi a ni thin a, ralthuam leh defence lama mamawh dangah te kan intodelh a hun tawh hle a ni tiin Mizoram Governor chuan defence seminar hlawhtling tak an neih theih nan a chhimtu zawng zawngte duhsakna a hlan a ni.