Vawiin chawhnu khan Parliamentary Secretary for School Education Pu Joseph Lalhimpuia chuan Sarva Shiksha Abhiyan (SSA) zirtirtute hlawh Sorkar laipuiin a sanction dan leh pek an nih dan chungchangah thuthar lakhawmtute a a pisaah a kawm.

Pu Joseph Lalhimpuia chuan sorkar kum 2016-17 chhung atan Sorkar laipui chuan Mizoram SSA tan Rs. 19625.21 lakh a approve sak thu leh, chumi atang chuan December, 2016 thleng khan 24.88% chauh hmuh a la nih thu a sawi a. SSA atan Sorkar laipui atanga sum hmuh ah hian state sorkarin a lo dolet ve tur, State Matching Share (SMS)-ah Mizoram Sorkar chuan harsatna a awm loh thu tarlangin, sorkar laipui atanga sum release a muanchan thin avanga harsatna hi awm ta a nih thu a sawi bawk.

Parliamentary Secretary chuan Mizoramin Sorkar laipui atanga September ni 29, 2016-a 1st installment sanction Rs. 1441.31 lakhs a hmuh chu SSA Account-a 22.11.2016 ah a luh hnuin a tuk 23.11.2016 ah District tinah release a nih nghal thu a sawi a. A la bang zawng chu State Matching Share nen a belhkhawm pawhin Mizoram SSA zirtirtute thla khat hlawh a daih loh avangin sum chuang bang chu a duh apiang enfiah theihin SSA Account-ah dahthat a la nih thu a tarlang bawk.

Parliamentary Secretary chuan Sorkar laipui atanga SSA sum hmuh chungchanga harsatna tawk hi Mizoram chauh anih loh thu a sawi tel bawk a. Kumin kum 2016-2017 chhung in SSA atan Budget Estimate chu Rs. 22,500 crore a ni a. State leh Union Territory 36 atan Project Approval Board (PAB) outlay chu Rs. 74,248 crore niin, Central component chu Rs. 46,700 crore-ah dah a nih si avangin pawisa mamawh zat leh Budget Estimate hnuaia state leh UT ten an chan tur a in pha manloh avangin SSA hnuaiah hian sum harsatna hi a awmlo theilo ani, a ti a. Heng karah hian Mizoram Sorkar chuan theihtawp a chhuah thu tarlangin, Sorkar hotuten Central-ah sanction release tura nawr rengin, tunah hian Rs. 71 crore hmuh mai an beisei mek thu Pu Joseph Lalhimpuia hian a tarlang bawk a ni.

SSA atan hian November-a sanction hmuh bakah hian Government of India atangin May ni 12, 2016 khan Adhoc Grant atan sanction Rs. 2265 lakh hmuha lo ni tawhin, SSA Account-ah July ni 44, 2016 khan a lut a. State Matching Share Rs. 612.52 lakhs pawh chumi hnu chuan Mizoram Sorkarin release in, 30.8.2016 leh 23.9.2016 khan SSA Account-ah a lut ve leh a. Tichuan kum 2016-2017 chhung atan SSA sum hmuh tawh zawng zawng chu Rs. 4318.83 lakh a ni a. Hei bakah hian Opening Balance SPO ah Rs. 563.92 awmin, a zavaiin Rs. 4882.75 lakh chu sum awm zat chu a ni a. Heng hi Salary bakah SSA inenkawlna behbawm (component) hrang hranga hman a nih hnu in Rs. 658.98 lakh a la bang a. November thla a 1st Installment hmuh khin letna tur (SMS) Rs. 160.15 lakhs pawh Mizoram Sorkarin 22.12.2016 khan sanction tawhin, SSA Account-ah thunluh mai theih tawh a ni a. Hemi nen belhkhawm hian thla khat salary component (Rs. 863.15 lakhs) chu a daih ta lo a ni.

Vawiin inkawmkhawmah hian School Education Department hotute an tel bawk a ni.