Assam Rifles leh Mizoram Football Association tangkawpa buatsaih ‘K Kawla U-19 Football Torunament Hunt Mizoram 2017’ chu vawiin khan Mizoram Governor Lt Gen Nirbhay Sharma, PVSM, UYSM, AVSM, VSM, (Retd) chuan AR Ground, Aizawl-ah a hawng.

He Tournament hi Union Ministry of Home Affairs hnuaia hmalakna chi khat ‘Oorja-CAPF Football Talent Hunt Tournament 2017’ kalpui mek zela buatsaih niin India-in kumin October thlaa FIFA U-17 Football World Cup a thleng tur atana rampumah football tihlarna tura hmalak a ni nghe nghe. Ooorja hnuaiah hian Assam Rifles te chuan Meghalaya, Manipur, Mizoram leh Nagaland-ah te he Football Talent Hunt Tournament a buatsaih dawn a. Stage 1-ah May thla chhungin state level tournament an zo fel vek ang a, Stage 2-ah June thlaah Shillong-ah tournment buatsaih a ni ang a, Stage 3-ah chuan July thlaah Delhi ah rampum huapa Tournament hmawrbawkna a awm dawn a ni.

Mizorama khelh tan K Kawla Tournament-ah hian district 8-a football asscociation atangin football thiam mipa leh hmeichhia te an tel a ni.