Vawiin khan Mizoram Governor Lt Gen Nirbhay Sharma, PVSM, UYSM, AVSM, VSM (Rtd) chuan Raj Bhawan building thar Phase-I sak zawhfel tawh chu a hawng a. He hunah hian Governor nupui Pi Jyotsna Sharma, Mizoram Chief Minister Pu Lal Thanhawla leh a nupui Pi Lal Riliani, Home Minister Pu R.Lalzirliana, H&TE Minister Pu R.Romawia, Education Minister Pu H.Rohluna leh ex-Chief Minister Pu Zoramthanga bakah Mizoram sorkar officials pawimawh engemawzat an tel.

Raj Bhawan Phase-I hawnna inkhawmah Mizoram Governor Pu Nirbhay Sharma chuan kum 2011 khan Raj Bhawan sakna tur lungphum chu phum a nih thu tarlangin, Mizoram PWD ten theihtawp chhuahin hun reiloteah building thar mawi tak hawn a ni thei ta chu a lawmawm hle a ni, a ti a. Raj Bhawan building hlui (heritage building) leh Governor’s Secretariat Office leh Durbar Hall lam pawh sakthat mek a nih thu sawiin heng building thar zawng zawngte hi Mizoram leh Mizo mipuite darthlalang an nih dawn avangin hmundangte pawhina an entawntlak khawpa sakthat a pawimawh a, Mizo hnam zerang leh ropuina phochhuaktu an ni tur a ni, a ti bawk. Raj Bhawan sakthat chungchangah Mizoram Chief Minister Pu Lal Thanhawla’n a phurpui leh theihtawpa hma a lakpuina zawng zawngah lawmthu a sawi a. Mizoram chhungah hmasawnna kalpui mekte chu a tha thei ang berah tihpuitlin a nih theih nan PWD bakah sorkar department dangte leh mipuiten mawh an phur theuh a. Mizoram pawn atanga mithiam chah chhuah ngai lovin Mizo engineer-te chu an thiam tawkin an rintlak a ni tih sawiin Governor chuan project reng rengte thawh zawh hun leh sum sen tura bituk sa (estimate) chu pelh loh hram a, quality tha bera thawh hi kan tih makmawh a ni, a ti.

Mizoram Chief Minister Pu Lal Thanhawla pawhin thu sawiin Raj Bhawan chuan Mizoram history-ah hmun pawimawh tak a luah thu a tarlang a - a hmasa berin Superintendent of Lushai Hills chenna niin Mizoram Union Territory-a puan a nih hnuah ‘Raj Niwas’ tih a ni a, Mizoramin statehood a neih hnuah ‘Raj Bhawan’ tia hriat a ni ta a ni, a ti. Kum 1953 khan India Prime Minister hmasa ber Pandit Jawaharlal Nehru leh a fanu Indira Gandhi Mizoram an lo zin khan Raj Bhawan kawt ngeiah public meeting an neih thu a tarlang bawk. Chief Minister chuan 13th Finance Commission hnuaiah Raj Bhawan sakthatna tur sum pek a ni a, INTACH Mizoram Chapter hmalakna avangin hmun hlui humhim tur ‘heritage site’ ah puan a ni ta bawk a; a building hlui ber pawh hi a hmaa a ruangam (original structure / heritage character) ang thei bera sakthat a nih tur thu a tarlang bawk. Raj Bhawan sakthat hna chu Governor hlui Lt Gen MM Lakhera hunlaia lungphum phum a nih thu sawiin Pu Lal Thanhawla chuan tuna Mizoram Governor ni lai Lt Gen Nirbhay Sharma chuan Raj Bhawan building hrang hrang sakthat hna hi tuipui hlein amah ngeiin hnathawk dan a vilpui thin avangin hun reiloteah Raj Bhawan Phase-I building thar hi hawn a ni thei ta chu a lawmawm takzet a ni, a ti bawk.

Vawiin Raj Bhawan Phase-I hawnna inkhawmah Er.Henry hian Lalmuankima, Chief Engineer (buildings), Mizoram PWD atangin technical report ngaihthlak a ni a. Raj Bhawan sakthat hna hi M/s Brahmaputra Infrastructure Ltd, Guwahati ten an thawk a, Phase-I sak zawh nan cheng nuai 2118.50 sen a ni.