Mizoram Governor Prof. Jagdish Mukhi chuan nimin khan Raj Bhavan, Aizawlah Mizoram sawkar department hrang hranga hotulute kawmin Centrally Sponsored Scheme an kalpui dan a sawipui.

Governor chuan sawrkar laipui atangin hmasawnna hna thawhna tur sum lo kal te chu a dawng tur dik takin an dawng em tih te, a dawngtuten an hmang tangkai em tih te uluk taka vil zui turin sawrkar hnathawkte a chah a. State chhung hmun kilkhawr zawk te tlawh a, a hmun ngeiah kal a, enfiah a, mipuite dinhmun zirchiang tur leh harsatna an tawh te hmuh pui a, a chinfel dan ngaih tuah chu a ngaihpawimawh thu a sawi.

Sawrkar laipui hmalakna, kum 2022 ah chuan lo neitute tharchhuah a leta tihpun tumna Doubling Farmers Income by 2022 chu a taka tihlawhtling turin District tinte kum khat chhunga an hlen chhuah tur bituk siamsaka,  District tin atanga vil hneh a tul bakah Agriculture leh a kaihhnawih department dangten thawhhona tha an neih a tul, Governor chuan a ti a. Mission Organic Mizoram leh diversification of crops sawrkarin a kalpui mek chu tha a tih thu a sawi. Sawrkar hnathawkte leh lo neitute thahnemngaihna avangin kum 2022-ah chuan Mizoram leh hmar chhak state danga lo neitute tharchhuah a leta a pun hman ngei a beisei a ni.

Prof Jagdish Mukhi hian nimin vek khan Mizoram University Vice Chancellor Prof. K.R.S. Sambasiva Rao leh University senior official-te nen inkawm hona hun an hmang bawk a. MZU inkaihhruaina leh hnathawh dan kalhmang tha a tih thu Governor hian a sawi. Tun dinhmunah MZU hi National Institutional Ranking Framework (NIRF)-ah 76na a ni mek a. National Assessment and Accreditation Council chuan Grade A a pek bawk a ni.

Nimin Governor hoa meeting hi tum nga neih a ni a. Meetingah hian Public Health Engineering, Power and Electricity, Food Civil Supplies and Consumer Affairs, Agriculture, Animal Husbandary and Veterinary, Horticulture, Irrigation and Water Resources Department-a Secretary, Engineer-in-Chief, Chief Engineer, Director leh Officer dangte an tel a ni.