Vawiin khan I&PR Secretary leh Press Accreditation Committee Chairman ni bawk Pu Sangdingliana hovin I&PR Auditorium-ah press accreditation card semchhuahna hun hman a ni.

Pu Sangdingliana chuan accredited journalist tura Press Accreditation Committee in uluk taka a thlan chhuah, accreditation card dawngtute zawng zawng a lawmpui thu a sawi a, tangkai taka hmang turin duhsakna a hlan. Journalist-te chu an thuziak leh puanzarin ram inrelbawlna thlenga nghawng a neih theih avangin an pawimawhna hre thar tur leh an thuziak te uluk lehzuala endik thin turin a fuih a ni.

I&PR Director leh Press Accreditation Committee Secretary ni bawk Pu David L.Thangliana pawhin thu sawiin accredited journalist te chu an dinhmun a pawimawh em avangin journalist zingah pawh uluk taka thlan chhuah an ni, a ti a. Sawrkar pawhin hamthatna a pe a, zin nihkhuaah pawh an hmang tangkai thei tih sawiin Director chuan card dawngtute chu zahawm taka invawng turin a chah.

MJA President Pu Zonunsanga Khiangte pawhin accredited journalist ni tura sawrkarin a thlanchhuahte chu sawrkar hmalakna leh function taima taka puanzar te, sawrkar ni pawimawh Republic Day, Independence Day leh a dangte ngaih pawimawh te chu an mawhphurhna a ni, a ti bawk.

March ni 7, 2019-a Press Accreditation Committee thukhawm chuan accredited journalist ni thei tur Mizoram pum atangin mi 141 a thlang chhuak a.  Aizawl District atangin mi 60, Lunglei District atangin  mi 19, Saiha District atangin mi 12, Champhai District atangin mi 13, Kolasib District atangin mi 12, Serchhip District atangin mi 10, Lawngtlai District atangin mi 8 leh Mamit District atangin mi 7 te chu Accredited Journalist tura thlan an ni. Press Accreditation Card hi kum hnih chhung a nung dawn a ni.

Press Accreditation Card semchhuah inkhawm hi I&PR Joint Director Pi Lallianpuii’n a kaihhruai a, I&PR Joint Director dang Pu Lalnunkima chuan lawmthu sawiin hun hnung a khar a ni.