Mizoram Governor PS Shreedharan Pillai leh Lady Governor Reetha Sreedharan te chuan vawiin khan lehlangin Champhai an rawn tlawh. Governor hmuahna leh inkawmhona Champhai Circuit House Conference Hall-ah buatsaih a ni.

Governor leh Lady Governor puala lawmna leh inkawmhona hun buatsaihah Governor Pu PS Shreedharan Pillai chuan Champhai tlawh theia awm leh an lo dawnsawnnaah lawmthu a sawi a. Mizoram Chief Minister hnen tangin Champhai leh a chhehvel chungchang engemaw chen a lo hriat tawh thu sawiin, Mizote tunhma nun dan phung, Rih Dil leh rin dan thlenga a hriat thin thu leh zirlai ang maia hriat belh tuma inzir zel a nih thu a sawi a. Mizoram chu ram nuam tak, a mi chengte pawh thinlung thianghlim tak pu mi ni a a hriat thu leh khawtlang anga lungrual taka khawsakhona leh sawrkar tawiawm tlat thinnate chu a fak a. Mizoram Governor chuan District hrang hrangte a tahtawla tlawhchhuah vek a tum thusawiin, Mizo tawng chawinun zel kawngah tanlak angaih thu a sawi a ni.

Mipui thlan ram hruaitu leh sawrkar hnathawkte chu an mawhphurhna hlena, mipuite rawngbawl kawngah thahnemngai taka thawk zel turin a chah a. Mipuite zinga hun tam thei ang ber hmanga an harsatna leh mamawhte hriatpui thei turin a fuih a. Khua leh tui a te ber thlenga an nitin nuna mamawh ang tura tuk chin tal an dawn chu zalenna tluantling a ni tiin, India rama cheng za zela 26% te chuan mamawh ang tura bithliah hniam ber pawh an la dawng theilo a ni, a ti a. Sawrkar laipuiin North East State hmasawnna a ngaihpawimawh thu pawh sawiin, India ram mipui vaibelchhe 134 atanga za zela 3.5 awmna North Eastern States tan Budget atangin za zela 10 vel a dahsak thu a tarlang bawk.

Mizoram chhunga Sawrkar, tlawmngai pawl NGO te leh Kohhrante inkara thawhhona tha tak awm chu fakin, Mizoram chuan hmabak eng tak a neih thu a sawi a. Zirna lamah abikin Mathematics leh Science ah tanlak thar leh mahni intodelh tuma chona hmachhawn ngam a tul thu sawiin, intodelh tur chuan chona thar hmachhawn ngam angai ani, a ti bawk.

Champhai Circuit House-a Governor lo lawmna leh inkawmhona hun buatsaih hi Champhai District Bawrhsap Pu SL Naveen, IAS chuan a kaihruaia. Champhai District dinhmun tlangpui tarlangin, Sawrkar department hrang hrangte hlawhtlinna tlanglawn powerpoint presentation hmangin a sawifiah a. Coronavirus Disease chungchanga District hmalakna tarlangin, Medical Screening leh inkalpawhna chungchangah khuahkhirhna felfai tak kalpui anih thu a sawi a. Khawtlang hruaitu, NGO-te tawiawmnaah lawmthu a sawi bawk.

Champhai SP Pu Rex Zarzoliana pawhin Champhai Police dinhmun tlangpui leh hlawhtlinnate powerpoint presentation hmangin a pe bawk a ni. Hemi hnu hian Governor hian Kohhran hruaitute, NGO hotute a hrangin a kawm a. Chaw hnu lamah Mazuia Memorial Home (TNT) a tlawh a ni.

Mazuia Memorial Home, TNT Champhaiah programme tawi buatsaih a ni a. He hun Pu Lalhmingmawia, Director, Mazuia Memorial Home, TNT Champhai kaihhruaiah hian Mizoram Governor chuane mahni mihringpuite rawngbawl sak hna chu Pathian rawngbawlna dik tak anih thu a sawi a. A thil hmuh leh hriat chuan chona leh phurna thar a pek thusawiin, Pathian awmzia lantirtu a ni, a ti a. Tanpuina thilpek a pe a, an kalzelna turah duhsakna a hlan a ni.

Governor hian tukin dar 9:15 ah Champhai Helipad a rawn thleng a, Champhai Helipad-ah DC, SP leh Official te'n lo hmuakin Guard of Honour pek a ni a. Champhai Circuit House-ah Sawrkar department hotute a kawm a. Kohhran hotute, NGO hruaitute a hrangin a kawm hnuah Mazuia Memorial Home TNT Champhai a tlawh a. Chawhnu lamah Champhai chhuahsanin Aizawl a pan a ni. Ruahman dan chuan Mizoram Governor chuan naktuk hian Khawzawl District a tlawh dawn a ni.

Vawiin Governor Champhai tlawhna hunah hian Pu SL Naveen, DC; Pu Rex Zarzoliana, SP; Sawrkar department hotute, NGO, Kohhran hruaitute leh Chanchinbumite an tel a ni.