Ni 9.3.2019 (Inrinni) khan Durbar Hall, Raj Bhavan-ah Prof. Jagdish Mukhi  chu Justice Nelson Sailo, Judge Gauhati High Court chuan  rinawmna thu a tiam tir hnuah  Mizoram Governor 19-na atan  lakluh a ni. MIzoram Governor kalchhuak ta Pu Kummanam Rajasekharan chuan a mawhphurhna a bansan tak avangin  Prof. Jagdish Mukhi hian  a hna pangngai, Assam Governor hna bakah Mizoram Governor mawhphurhna hun engemaw chen chhung chu a chelh dawn a ni.

Prof. Mukhi hi kum 1942 December ni 1 khan Dajal, Dera Ghazi Khan, tun hnua Punjab Province, Pakistan-ah khuan  a lo piang a. India leh Pakistan then hran hun, Partition of India lai  khan Sohna, Gurgaon District, Haryana State-ah an pem a ni. Thiamna lamah amah hi  B.Com, M.Com leh PhD in Finance a ni a. Indian Police Service(IPS) a bansan hnuin Shaheed Bhagat Singh  College, Delhi University-ah Professor hna te rei tak a thawh hnuiin Politics lamah a zuang lut ta a ni.

Governor thar lakluhna inkhawm hi chawhma dar 11: 00 AM khan tan a ni a. Chief Secretary Pu Lalnunmawia Chuaungo chuan programme a kaihruai a. He hunah hian Chief Minister Pu Zoramthanga, Speaker Pu Lalrinliana Sailo, Cabinet Minister te, Minister of State te, MLA te leh mi pawimawh leh sawmbik te an tel a ni. Swearing in Ceremony neih zawhah Chanchinbumite nen inkawmna hun Banquet Hall-ah neih a ni a. He hunah hian Governor thar chu Chief Minister Pu Zoramthanga chuan a tawiawm a. Chanchinbumite  zawhna te chhangin Mizoram sawrkar mumal taka a kal reng theihna turin a tihtur te rinawm takin a ti dawn tih a sawi a ni. Governor thar hi inrinni vek khan Guwahati panin a thlawk thla leh a. Vawiinah rawn thlawk chho leh in chawhnu hian Lok Ayukta Chairman thar a lalut ang a. Naktuk, March ni 12 khian 8th Mizoram Legislative Assembly  a Budget Session-ah thu a sawi dawn a ni.

Attachment

  • Loading attachment...