Vawiin khan Health & Family Welfare Minister Dr. R.Lalthangliana chuan Mizoram Health Multipurpose Service Association (MHMSA) General Conference Vawi 37 hawngin, Khuallian a ni. MHMSA General Conference hi Chanmari YMA Hall-ah hman a ni a, MHMSA General Headquarters President Pu Lalrinawma Sailo chuan General Conference hmang zawng zawng te a lo lawm a ni.

Khuallian Dr.R.Lalthangliana chuan Health Department chu Department pawimawh tak niin, damlo enkawl chungchangah thiamna piah lamah inpekna a ngai hnem bik a, thawktute tawngkam in damlote damna a keng tel a ni, a ti a. Mizoram Sawrkar chuan Health Worker Post ruak 200 awm chu a ngai pawimawh a, kum thar lamah hnawhkhah dan ngaihtuah a ni ang a, Community Health Officer post ruak 32 pawh sawrkarah thlen mek a ni, tiin Khuallian Dr. R.Lalthanglian chuan a sawi a. Health Minister chuan Zemabawk-a cancer enkawlna pawh cheng Nuai 1100 sengin khawl thar neih a ni dawn a, heng bakah hian Japan International Funding atangin India hmarchhaka a hmasa ber atan Cancer Speciality Hospital pawh din a ni dawn a ni, tiin a sawi a. Minister chuan Cancer Speciality Hospital hi nakin zelah state dang pawhin an rawn la pan a beisei thu a sawi bawk a ni.

MHMSA General Conference hawnna-ah hian member boral sunna neih a ni a, Health Worker Training School, Kulikawn leh MFM Training School Bawngkawn te chuan zaipawl hla an rem a, MHMSA General Conference hawnna hi Finance Secretary Pu J.C. Lalbiaktluanga chuan lawmthu sawiin a khar a ni.

MHMSA General Conference hi Ni hnih awh tur a ni a, vawiin hian agenda hrang hrang ngaihtuah ho a ni ang a, naktuk First Session-ah National Health Mission Director Dr. Eric Zomawia chuan Health & Wellness chungchangah health worker te training a pe ang a. Second Session-ah Kum 2020-2021 atana hruaitu thar thlanna neih a ni ang.