Vawiin khan Sports Minister Pu Robert Romawia Royte pisa, Mizoram New Capital Complex-ah 13th South Asian Games 2019, Nepal-a khelh zawh taka gold medal latu Mizo tlangval pathum - Lalthlamuanpuia, Daniel Lalhumthanga leh Lalfakzuala te lawmpuina hun hman a ni.

Pu Robert Romawia Royte chuan South Asian Games-a medal late lawmpuiin Mizoram chauh ni lo India ram tihmingthatu, kan hnam leh kan ram timawitute an ni, a ti. Kal zelna tur kawng thui tak erawh an la nei tih sawiin Sports Minister chuan tumruhna, taimakna, tih tak takna leh inpekna nei turin a fuih a. An medal lak te ropui hle mahse a aia hlawhtlinna duhawm zawk leh hautak zawk beih tur an la nei tih hre reng turin a chah. Pu Robert Romawia Royte chuan State Games neih mek chungchang pawh he hunah hian sawi langin hlawhtling taka kalpui chhoh mek a ni chu lawmawm a ti a. Mizoram mipuite kan tangrual tha a, Sports Association hrang hrangte pawh an phur nia a hriat thu leh rah tha a chhuah ngei a beisei thu a sawi bawk.

Lalthlamuanpuia, Daniel Lalhumthanga leh Lalfakzuala te hian South Asian Games ah hian India Taekwondo Team ah telin Poomsae Under 23 Category ah team angin gold an lak bakah Lalthlamuanpuia hian individual event ah bronze medal a dawng bawk. South Asian Games a tel tur hian September thla atangin ngawrh takin an inbuatsaih a, November ni 18 ah selection an hmachhawn a. Selection Board an paltlang hnu hian South Asian Games-a an kal thlengin training camp-ah an awm chhunzawm nghal a ni.

Programme hi Sports Secretary Pu H.Lalengmawia’n a kaihruai a. Mizoram State Sports Council Secretary Pu C.Laltlanthanga leh coach Pu Joseph Thansanga te pawhin thu an sawi. Pu Joseph Thansanga hian an training atanga South Asian Games an hmachhawn thlengin infiammi pathumte hi a kaihruai a ni.

Attachment

  • Loading attachment...