Langa Mizoram rawn tlawh Pi Sonia Gandhi, Chairperson, National Advisory Council/ United Progressive Alliance chuan vawiin khan ama puala vantlang inkhawm 3rd MAP Ground, Mualpuia buatsaihah Chhingchhipa Sainik School sakna tur ribbon chep chatin lungphum a phum a, 4th Phase NLUP hawng bawkin Food Security Scheme Mizoram tan a tlangzarh bawk.

Pi Sonia Gandhi chuan Mizo mipuite chibai bukin, Mizoram chuan a thinlungah hmun thuk tak a chan thu sawiin, Mizote chu hnam taima leh thawkrim an nih thu leh India ramah hnam hrang hrang kan cheng tih ti kimtu an ni a ti. Kan tu leh fa te, thangtharte hmakhaw relna atan zirna hi a bulpui ber a nih thu sawiin, “Thalaite chu kawng hrang hranga kan chhawmdawl an tul a ni,” a ti a. Sainik School Chhingchhipa sak tura phut let neilova ram petute, Chhingchhip VCP, Pu Lalchungnunga Sailo leh chhungkaw 42-te chungah lawmthu sawiin, he sikul hi thalaiten thiamna tak tak an puakchhuahna atan an hman ngei a beisei thu a sawi bawk.

Ram hmasawnna a kal chhoh mek rualin, eitur khamkhawp hmuhloh avanga harsatna leh thihna a thlenloh nan, Food Security Bill chu pawm anih thu a sawi a, a mamawhtuten tangkai taka an hmang tur chu lawmawm a tih thu a sawi bawk.

NLUP pawhin hmasawnna thar a thlen chu chhungkaw tam takin an hmang tangkaia, sum leh pai dinhmun siamthat kawngah Mizoram sorkar chu a hlawhtling hle a ni, a ti bawk. Eirukna leh nundan diklo veng tura Ethics Committee din a ni chu fakawm a tih thu sawiin, RTI nen tangkawpin, state rorelna dik leh langtlang taka kalpui theih a nih tur thu a sawi bawk.

Power lama intodelhna turin, 210 Megawatt Tuivai Hydel Project pawh sorkar laipuiin a pawmpui tawh thu sawiin,hei bakah lui pasarihah hmalak tura ruahhman a ni a, ram leilung leh nungchate tichhe lo turin, hmasawnna hna kalpui a nih tur thu a sawi bawk. UPA sorkarin thenawm ramte nena inlaichinna tha nei tura a hmalak tawhna leh hmachhawpte chu Mizoram tan ei leh bar leh sumdawnna kawngah hmasawnna duhawm tak thlentu a nih tur thu a sawi bawk. Remna leh muanna avangin, Mizoramah hmasawnna hnathawhte tluang taka kalpui a ni, a ti a, Mizoram chu state dangte tana entawntlak a nih thu leh, sorkar laipui chuan Mizoram state hmakhua a tha thei ang bera a ngaihtuah zel tur thu a sawi bawk.

He inkhawm hi Pu Lal Thanhawla, Chief Minister chuan kaihruaiin, sorkarna an chan atangin tihtur tul leh hmachhawp tam tak an neih thu sawiin, chak taka an hmalaknate leh langtlang sorkar nei tura an thawhnaten rah duhawm a chhuah mek thu a sawi a. Mipuiten eizawnna ngelnghet leh innghahna tlak an neih theih nan, New Land Use Programme, Hriselna leh Zirna te chu ngaih pawimawh hmasak an nih thu sawiin, Sorkar laipui thlawpna tha tak avangin, NLUP pawh hlawhtling taka kalpui mek niin, chhungkaw nuai 1.35 tuamchhuah a nih tur thu a sawi bawk .

60 Megawatt pechhuak thei, Tuirial Hydro Electric Project chu kum 2014-a hawn theih tura ruahman a nih thu leh, sorkar laipui atangin 210 Megawatt Tuivai Hydel Project sak phalna hmuh anih thu sawiin, hengte hian power-ah nasa takin intodelhna a thlen tur thu a sawi bawk. India sorkarin “Look East Policy” a kalpui mek chu Mizoram tan pawha hamthatna tam tak thlentu tur leh, a ram hausaknate haichhuahna tur anih thu a sawi bawk. Medical College leh Agriculture College-te Mizorama kan neih theih nan, sorkar laipui puihna kan mamawh thu sawiin, state sorkar chuan rorelna dik leh langtlang, mipuite mamawh leh tumte tihlawhtling turin hma a lak zel tur thu a sawi bawk.

Pi Sonia Gandhi hi Pi Ambika Soni, Punjab MP leh Pu Luizinho Faleiro, General Secretary, AICC ten an rawn tawiawm a ni. He inkhawm hi Pu Liansailova, Finance Minister chuan lawmthu sawiin a khar a ni.