Transport Minister Pu Zoram Sangliana chuan September ni 19, 2013 zan khan Aijal Club-ah Salvation Army International Secretary Commissioner Lalzamlova pualin zanriah a buatsaih a, Salvation Army Service Officer leh Retired Officer engemaw zat an tel a ni.

Transport Minister chuan thu sawiin, khawvel huap a Chanchin Tha hrilhdarhna kawngah tangkai zawk leh zau zawk a rawngbawlna Mizo ten kan neih theihna tura Mizo Pa ngeiin hmun pawimawh tak a luah chho zel chu lawmawm a tih thu a sawi a, an rawngbawlna kawngah malsawmna an dawn zel theih nan a duhsakna a hlan bawk.

International Secretary Commissioner Lalzamlova chuan Transport Minister-in a puala a lo lawmna leh duhsakna zanriah a lo buatsaih sak chungah lawmthu a sawi a. Pu Zoram Sangliana chuan duhsakna thilpek a hlan bawk a ni.