Law Commission Chairman Pu R. Lalrinawma chuan vawiin khan MLA Fund atanga sak Sihphir YMA Conference Hall leh kawng, Sihphir Arpu venga mi chu a hawng.
He hawnna inkhawmah hian Pu R.Lalrinawma chuan hruaitu veng hmasawnna ngaihsak tak leh veng mipui tanrualna tha tak Sihphir vengin an nei chu lawmawm a tih thu sawiin, MLA Fund te pekchhuah anih na taka hman a ni leh a rahchhuah tha tak hmuh tur a awm chu lawmawm a tih thu a sawi. A bial chhunga chu Aizawl khawchhung a awm ni mahse khawpui nun tak tak an pawh phak chiah loh avang leh pem thar tam tak an awm reng avangin hmasawnna hna thawh tur a tam em em a, MLA Fund pawh sem zai thiam a ngaih hle thu sawiin, chuti chunga rotling hmunhma tha tak siam leh sak a awm nual chu lawmawm a tih thu a sawi. Sihphir veng tui harsatna tawh pawh a sutkian dan ngaihtuah zel a nih thu a sawi bawk.
YMA Conference Hall hi a zau zawng 600 sq.ft niin, seminar leh committee pawimawh thlen nana tih a ni. MLA Fund Rs 5,00,000/- bakah mi in phal te thawhkhawm atanga sak a ni.
Kawng hawn hi MLA Fund Rs.1,00,000/- hmang a siam niin, black top, jeep road a ni. 150m a sei niin 8ft a zau a ni a, Neihbawih welfare in a hnatlang a an siam a ni.
