India ram hmundang rualin nimin khan Vairengte Field No II ah Independence Day vawi 70-na chu ropui taka lawm a ni a, he hunah hian khawchhung sorkar hnathawk, NGO hruaitute, Zirlai naupangte bakah, mipui thahnem tak an tel a ni.

Independence Day lawmna hi nimin chawhma dar 10 khan Vairengte Field No II ah neih tan a ni a, Khuallian Bialtu MLA Pu K.Lalrinthanga Parliamentary Secretary chuan India hnam puanzarh pawt pharhin, chibai bukna a nei a, Gov’t Vairengte High School ten India hnam hla an sa bawk a ni. Hemi hnu hian March Past neih chhunzawmin, khuallian chuan Parade Contingent te chibai bukna a chhang let a, Hemi hnu hian khuallian chuan thu sawi zawm nghalin, Independence Day lawm tura kal zawng zawng te chibai bukna neiin, India in zalenna a neih theih nana sulsutu Mahatma Gandhi, Jawaharlal Nehru, Sardar Vallabhai Patel, Maulan Abul Kalam Azad leh mi huaisen kal hmasa te hre reng turin mipuite a chah a ni.

Khuallian chuan mipui himna leh hlimna turin sawrkar chuan dan leh thupek kenkawh a ngai pawimawh hle a ti a, kum khat chhunga dan leh thupek kenkawh kawngah harsatna lian tham engmah kan tawk lova, state ralmuang ber te zinga chhiar tel kan la ni chhunzawm zel thei hi khawtlang mipuite leh tlawmngai pawl ten sawrkar an thlawp tlatna vang a nih thu a sawi bawk. NLUP chuan hmasawnna kawngah rah tha a chhuah tih sawiin, Economic Survey chuan tlangram lo neih chu za zelah sawmhnih pakhatin a tlahniam tih a tarlan thu a sawi a, NLUP hlamchhiah lovin state sawrkar chuan hmasawnna tluantling leh huapzo ruahmanna thar New Economic Development Policy (NEDP) - Comprehensive Growth Strategy for Mizoram a duang a, NEDP hnuaia annnual action plan 2016-2017 chu kalpui tan tum a ni a, Rs 2,50,00,00,000 dah a nih thu a sawi bawk.

Khuallian chuan kum 2014-2015 ah buhfai 60,647 MT kan thar laiin kum 2015-16 ah chuan 62,377 kan thar a, 2.29% in a pung a, Oil pam chingtuten huang zauh zelin, kum 2014-2015 khan hectare 20,377 a zau ah chin a ni a, kum 2015-2016 ah erawh chuan ram hectare 23,358 a zau ah chin a nih tawh thu a sawi bawk.

Khualian chuan 60MW Tuirial Hydro Electric Project chu peihfel tep tawh niin hnathawk thei tura hawn thuai a ni ang a, 210MW pe chhuak thei tur Tuivai Hydro Electric Project pawh bul tan thuai a nih theih nan chak taka bawhzui a ni a ti bawk. Vairengte to New Vervek via Phainuam, Saiphai, Zohmun National Highway 2016-2017 Action plan chu central sawrkarin an pawm tawh thu a sawi bawk.

Khuallian chuan Mizoram sorkarin Rs 96,00,00,000 sengin Department kudam 17 a sa mek nia sawiin, NABARD hnuaiah Rs 32,68,00,000 hmangin kudam 27 sak mek a nih thu a sawi bawk. Heng Kudam te hi sakzawh a nih hun chuan Mizoram in Buhfai Matric ton 8,000 zet dah khawl theih a ni ang a ti bawk. Mizoram ah National Food Security Act 2013 chhawrtu chhungkua 1,40,017 an awm a, NFS chhawr ve lo Non-NFSA chhungkua 1,20,979 an awm bawk a ti a, End to end Computerization of targeted Public Distribution System (TPDS) hmangin Ration card computerised vek a nih tawh thu a sawi bawk.

Khualzahawm, Dr Arun T IAS, SDO(C) Vairengte chuan thu sawiin, Indepedence Day lawmna hun hman a nih theih nan tha leh zung sengtute chungah lawmthu a sawi a ni.

Independence Day March Past ah hian Parade Contingent 6, Ex-Servicemen Vairengte, Vairengte Higher Secondary School, Gov’t Vairengte High School, Vairengte High School II, Vairengte New Secondary School leh St Henry School te an ni a, heng bakah hian tualchhunga Gov’t Primary School hrang hrang leh Private English Medium School ten Mizo hnamzia rang pho lang thei item chi hrang hrang an nei bawk a ni.

Independence Day ah hian Vairengte tihmingthatute chawimawina neih a ni a, chawimawina hlante hi John C.Zonunmawia Venglai Vairengte, MZU hnuaia BA result chhuaka Phylosophy Subject a Mizoram Topper leh BCA a Mizoram Topper C.Lalremtuata Banglaveng, Vairengte te hnenah chawimawina hi hlan a ni bawk.