3983/2024-2025

Aizawl, the 26th January, 2025: India ramin ama puala buatsaih Danpui a hman tanna ni, Republic Day 2025 chu India ram hmundangte rualin Mizoram hmun hrang hrangah vawiin khan lawm a ni a. Mizoram chhunga Republic Day vawi 76-na lawmna program lian ber chu tukin dar 7:30 khan Sipai Lammualah neih a ni. He hunah hian Governor Gen (Dr) Vijay Kumar Singh, PVSM, AVSM, YSM (Retd) chuan India hnam puanzar pawtparhin Parade contingent 23 te'n hnam puanzar zahna chibai an buk chu a chhanglet a. Hemi hnu hian Republic Day puala thuchah a sawi chhunzawm nghal a ni.

Governor Gen (Dr) Vijay Kumar Singh, PVSM, AVSM, YSM (Retd) chuan Republic Day vawi 76-na puala Mizo mipuite duhsakna chibai bukin, "He ni pawimawh takah hian kan tana hman tur Danpui kan insiam sak a, hei hian dikna, zalenna leh intluktlanna min pe a ni," a ti a. Danpui leh zalenna kan neih theih nana theihtawp chhuahtute chu he ni pawimawhah hian hriatreng an nih thu a sawi a. India ram inpumkhatna leh inunauna tichaka vawnnun tum tura mipuite sawmin, Mizoram chu chenna nuam, zahawm, ralmuang, hlawhtling leh hlimna hmuna siam tum turin a sawm bawk a. Republic day denchhena chawimawina hlante thinlung taka a lawmpui thu sawiin, he hun hlawhtling theih nana hmalatu zawng zawngte fakawm a tih thu a sawi bawk.

He hunah hian Governor chuan Sawrkar hmalakna leh hlawhtlinna tam tak zinga langsar zualte a tarlang a. Sawrkar flagship programme Bana Kaih hnuaiah mahni kutkawiha eizawng leh kuthnathawkte puih tum a nih thu leh, hei hi India ram intodelh 'Viksit Bharat @ 2047' hlen chhuah theih nana pawimawh tak a nih thu a sawi a. He scheme hnuaiah hian Progress Partner-te chu hmalakna tur loan pek an nih dawn mai bakah Sawrkar chu quarantor-ah a tang dawn a, partner banks - SBI, MRB leh MCAB te nen thawhhona thuthlung ziah fel tawh a ni a ti a. He scheme hnuaiah hian Chief Minister's Special Category Scheme tanpuina cheng nuai 1 thlenga dawn theihna a awm thu a sawi bawk a. Thlai thar thlan bik pali Sawhthing, Hmunphiah, Aieng leh Hmarcha ahte Minimum Support Price Sawrkarin a ruahman thu a sawi bawk. 

Governor chuan Mizoram chu state ralmuang tak a nih thu leh Assam nena ramri buai chinfel tuma tanlak mek zel a nih thu a sawi a. Security agency hrang hrangte hmalaknain dan lova ramri kaltlanga kuhva, drug, ralthuam leh puakthei tawlhruk thahnem tak man a nih thu sawiin, dan lova thil tih leh ruihhlo do kawngah Sawrkar, NGO, Kohhran leh khawtlangte thlah lova tanho zel a pawimawh thu a sawi a. A tarlan zel danin nikum chhungin PWD in kawng Km 194 a thui sial hna an thawh bakah Km 264 an black top a, Km 98 a thui high strength concrete road an siam a. Kawlphetha intodelh turin theihtawp chhuah mek zel a ni a, pre paid smart meter pawh hman thuai tum a ni. School thar building 14, Classroom 35, toilet block school 43 ahte leh school cheithat hna18 kalpui mek a ni a. Zirtirtu indaihlohna phuhruk nan engemawzat lak belh an ni a, National Education Policy 2020 phut angin State pual University din tum a ni bawk. 

Health Clinic 3 te Health Sub-Centre ah leh PHC 7 te CHC ah hlankai an ni a. Khum 50 leh khum 10 awmna Ayush Hospital, Sub-Divisional Hospital 1, PHC 3 leh Health Sub-Centre 41 sak mek a ni a. Urban Town 8 te ODF+ dinhmun an thleng tawh a, District 3 te ODF Plus Model an ni tawh bawk a. PMAY (G) hnuaiah in 25,361 sak tawh niin, sak mek 4,605 a awm a. Aizawl Chawnpui vengah PM Ekta Mall sak tum a ni a, tunhnai lawkah Mizoram Electric Vehicle Policy, 2024 pawh hriattirna chhuah a ni. MYC kaltlangin thalai 50 te eizawnna ngelnghet siam sak an ni a, sports discipline-te huam zau zawka chhawmdawl theih nan Mizoram Sports Incentive Cash Award Scheme chu siam that a ni a. Olympics 2036 ah Mizote kan tel ve ngei theihna tur tinzawnin hmalak mek zel a ni. Land Record Mangement System atan online portal duan a ni a. Thlai hriak sawrna Falkawnah bun mek a ni a. Lengpui ah Animal Feed Plant siam mek niin, fish hatchery thar 3 leh sangha dil hectare 148 a zau siam belh tum a ni bawk. 

Kumin Republic Day-ah hian Police, Excise & Narcotics leh Fire & Emergency Services hnathawk tha leh Khawpui fai intihsiakna lawmman a hnuaia tarlante hnenah Governor-in chawimawina a hlan a ni. 

A) President's Medal for Distinguished Service: 

1) Pu Zoramsanga Ralte, MPS, Deputy Commandant, 3rd Battalion MAP

B) Medal for Meritorious Service:

(i) Pu Kaste Romalsawma, MPS, Assistant Director, Disaster Management & Rehabilitation

(ii) Pu Vanlalhluna, Inspector, 5th IR Battalion

C) Governor's Gold Medal dawngtute: 

1) SI Lalmalsawmkima, PHQ

2) SI Lalremruata, Siaha DEF

3) SI Liansangpuii, Champhai DEF 

4) ASI Lalpianpuia, Siaha DEF

5) H/C Shyam Kumar, CID (SB)

6) Hav K. Lalhmangaihzuala, 2nd Bn. MAP

7) Constable Lalrinzuala Hnamte, Aizawl DEF 

8) SI Lalnunfela, Commissionerate of Excise & Narcotics

9) H/C PC Lalzamliana, Office of the Asst. Commissioner of Excise & Narcotics, Aizawl District

10) Constable Lalnunengi, Office of the Asst. Commissioner of Excise & Narcotics, Aizawl District

11) Fire fighter K. Lalengthuama, ITI Fire Station 

D) Governor's Silver Medal dawngtute: 

1) SI Lalhmunmawia, 1st Bn. MAP

2) ASI HV Thansanga, Mamit DEF 

3) ASI A. Lalthianghlima, Siaha DEF

4) ASI C. Vanlalruata, Khawzawl DEF

5) ASI Chanchinmawia, Saitual DEF 

6) ASI Lalbiaknunga, Champhai DEF

7) Constable Peter Lalramchhana, CID

8) Constable R. Lalnunzira, Office of the Asst. Commissioner of Excise & Narcotics, Aizawl District

E) Khawpui fai intihsiakna lawmman hetiang hian sem chhuah a ni bawk.

A) Urban Towns category:

1. Phullen

2. Tlabung

3. Biate

B) District Headquarters category:

1. Saitual 

2. Siaha

3. Serchhip 

Vawiin Republic Day vawi 76-na lawmna hunah hian Parade contingent 23; Armed Contingent 7, Unarmed Contingent 4, School Contingent 12 bakah Band party 3 an tel a. Parade Commander Yatin Sharma, IPS leh Second Commander Dr. Melvyn Varghese, IPS te'n Parade Contingent-te an kaihruai a ni. 

Governor Gen (Dr) Vijay Kumar Singh chuan Parade Contingent zinga lam thiam zual thlanchhuahte hnenah lawmman a hlan bawk. Armed Category-ah 2 Assam Rifles Contingent, 225 Bn CRPF leh 5th IR Bn te chuan parade thiam lawmman pakhatna, pahnihna leh pathumna an la a. Unarmed Category-ah Ex-Servicemen contingent, 20 Mizo Bn NCC (PUC) contingent leh 1 Mizo Bn NCC te chuan parade thiam lawmman pakhatna, pahnihna leh pathumna an la a. Schools contingent zingah Oikos HSS, Neuhof English Medium School leh Ephraim HSS chuan parade thiam lawmman pakhatna, pahnihna leh pathumna an la bawk. 

AR Ground hmuna Republic Day 2026 lawmna inkhawm neih zawhah Gen (Dr) VK Singh, PVSM, AVSM, YSM (Retd) chuan Circular Lawn, Raj Bhavan-ah sawrkar hotulute leh sawm bikte pualin At Home programme a buatsaih bawk a ni.

Full Speech of Hon'ble Governor of Mizoram on the occasion of Republic Day 2025 : https://dipr.mizoram.gov.in/post/republic-day-2025-lawmna-aizawl-sipai-lammual-a-governor-gen-dr-vijay-kumar-singh-pvsm-avsm-ysm-retd-thusawi-26th-january-2025