Ram chhung hmun dang ang bawkin vawiin khan Mizoram ah General Elections to Lok Sabha, 2019 leh Aizawl West-I Assembly Constituency Bye Election atana vote tla te chu 23/05/2019 hian chhiar a ni a,  Counting Centre 10 ah Counting Official 1321 ten vote tla hi an chhiar a ni.

General Elections to Lok Sabha, 2019 ah hian Mizoramah chuan inthlan thawh khatna (1st Phase) 11th April 2019 khan boruak muanawm tak hnuaiah vote thlak a ni a, vote chhiar tur hian Chief Electoral Officer (CEO) Office chuan uluk leh fimkhur taka inpuahchahna kalpuiin  vote chhiar ni a zawm tur ECI in ruahmanna thar a siam zawng zawng te pawh ngun takin District hrang hrangah zirchianna neih a inhmakhawsuih lawk a ni. 

Zirchianna uluk taka neih anih avang leh ruahmanna felfai tak avang hian harsatna awm lo leh rang takin vote hi chhiar theih a ni a, vawiin chawhma khan EVM vote tla zawng zawng chhiar zawh vek niin EVM a vote tla te chu hriat theih vek a ni. 

CEO office atang hian Communication Plan leh Data Management  felfai tak siam a ni a, hengte hi  Returning Officer leh ARO te tana buatsaih a ni. New Suvidha App leh Google Sheets chu tangkai taka hman a ni a, hemi avang hian Mizoram hmun hrang hranga vote chhiar result te a hriat zung zung theih a ni. 

Hei mai hi ni lovin,  Mizoram-a vote chhiarna leh vote chhiar dan ti famkim tu chu Electronically Transmitted Postal Ballot System (ETPBS) chhiar na atana Google Sheet hman kha a ni. ETPBS 4687 thawn chhuah zingah 3211 hmuh let a ni a, ETPBS te hi postal ballot chhiar hmaa chhiar tur niin, a chhiar tak tak a nih hma-in scan a ngai a, hei vang hian Pre-Counting Hall pawh a hranpa a buatsaih niin hei hi ARO 4 ten an vil a ni . Tukin khan ETPBS system hi India ram pumah a chhia a, hei vang hian Election Commission of India hriattirna lo chuan khawih chet ngam a ni ta lova, chawhma dar 11:30 khan ECI chuan manual a ETPBS te hi scan turin hriattirna a rawn chhuah ta  ani. CEO office, IT Team 3 te ETPBS scan enpui tura tirh an ni a, anni hian manual a scan a nih chuan ETPBS duplicate a awm thei dawn tih an hmuchhuak a, tichuan a hmunah Google Sheet hmang turin hma an la ta a ni. 

Google Sheet hman hian ETPBS duplicate leh a tak  a thliar hrang a, ETPBS a scan rual hian unique ID leh vote thlaktute hming a record nghal a ni. Hei bakah hian a scan chhung a rei lova, vote chhiar pawh rang takin a tih theih phah a ni.

Chief Electoral Officer (CEO) Office, Mizoram chuan Mizoram hmun hrang hranga vote chhiarna ralmuang tak leh muanawm tak kan neih avang hian vote chhiarna a mawhphurtu official zawng zawng leh Political Party, NGO leh mipuite chungah lawmthu a sawi a ni.