4042/2024-2025
Lawngtlai the 31st January 2025 : Vawiin khan Mizoram Journalists' Association (MJA) Lawngtlai District chuan Lawngtlai Press Club- ah 'Annual Conference 2025' an nei a. He hunah hian Pu C. Lalmuanthanga, CEM, LADC chuan khuallian niin a hmanpui a, LADC atangin Executive Member- Pu L. Daniala, Pu HC. Lalthawmliana, Pu C. Hrangthianga, leh Pu JB. Vanhoy ten an tawiawm a ni.
Pu C. Lalmuanthanga chuan MJA Member leh Annual Conference hmang tura kalkhawmte chibai bukna a nei hmasa a. MJA, Lawngtlai District - ten tlin taka hna an thawh kawngah fak an phu hle tiin, hna zahawm tak an thawh kawngah duhsakna a hlan a. Journalist- te chu sawrkar thu leh hla mipuite hnena puangzartu an nih angin, mipuite hnena thu dik leh belhchian tlak chauh thehdarh turin a chah a. Thuthar thehdarhtute an nih angin, remna piah lamah indona hial thlentheitu an nih avangin, rilru fim taka hnathawk fo thin turin a fuih a ni. Inpumkhatna leh inlungrualna pawimawhna sawiin, Pu C. Lalmuanthanga chuan Lai District chhunga hnam hrang hrang awmte inkara remna leh muanna thlentu pawimawh tak ni zel turin MJA, Lawngtlaite a chah a ni.
Khuallian chuan Journalist- te tel lovin khawvel a kal thei lo tih tarlangin, ram leh hnamin a mamawhna hre chiang turin a ngen a. Thudik tawk lo thehdarh kawngah fimkhur a tul hle tiin, fimkhurna piah lamah taihmakna leh rinawmna nena hna thawk tura fuihin; mipuite entawntlaka nung zel turin a chah. Pu C. Lalmuanthanga chuan MJA, Lawngtlai, tana Advertisement, Pension leh Press Tour- tha leh changtlung zawk siam turin theihtawp a chhuahpui zel dawn tih a tarlang bawk.
Pu Elvis Lathanzuala, President, MJA Lawngtlai District pawhin thu tawi sawina neiin, ram leh hnam tan thawhhona tha a pawimawh hle tih tarlangin, Mizoram sawrkar leh LADC nen thawhhona tha tak an neih thu a sawi a. Print media hluttu an la tam hle tih sawiin, Pu Elvis Lalthanzuala chuan tan lak thar erawh a tul hle tiin, MJA Member - te pawh intuaithar reng a turin a chah a. Sawrkar Official- te khalh ngil kawngah MJA ten mawhphurhna lian tak an neih angin, MJA te theihtawp chhuah tur leh dikna leh rinawmna humhalh zel turin Memeber-te a fuih.
Pu K. Zothanpara GS, MJA General Headquarters chuan Mizoram Journalists' Association (MJA) Member- te inkara thawhhona tha awm mek vawng nung zel turin tan lak a tul a ti a. Social media chak tak karah Chanchinbu hlutna kaitho thar turin MJA te theihtawp chhuah turin a fuih a. Ram leh hnam tana an hnathawh kawngah MJA,Lawngtlai District, an chhuanawm tak zet tiin, hma lam hunah pawh tha hnem ngai taka thawk zel turin a sawm nghal bawk.
Mizoram Journalists' Association (MJA) Lawngtlai District Annual Conference 2025- ah hian chawhma lamah rorelna neih a ni a. Hetah hian 'Lawngtlai District - a Raltlan leh thenawm rama bungrua lut leh chhuak hi mipui himna thui zawk thlir chungin awmzenei zawkin kalpui ni rawh se' tih chu lungrual taka pawm niin, chak taka bawhzui nise tih an rel a ni.
Vawiin Mizoram Journalists' Association (MJA) Lawngtlai District Annual Conference 2025- ah hian MJA General Headquarters atangin, Pu K.Zothanpara General Secretary, Pu Lalchhandama, Secretary, leh Pu Lalrinmawia Executive Member, bakah Pu C. Lawmsangzuala, IPRO, LADC ten an telpui thei a. Pu H. Lalrinmawia, Vice President, MJA, Lawngtlai District chuan lawmthu sawina neiin hun a khar.
