786/2026-2027

Aizawl, the 1st June, 2026: India ram puma June thla puma kalpui tur 'Khet Bachao Abhiyan' chu vawiin khan Mizoram Larsap General (Dr) Vijay Kumar Singh, PVSM, AVSM, YSM (Retd) chuan Lok Bhavan, Aizawlah a hawng. Khet Bachao Abhiyan hi Ministry of Agriculture and Farmers' Welfare kaltlanga lei da zel tur ven kawnga hmalakna a ni a. Hemi hmang hian lei tak dan zirchianna neih hmasak zet hnuah inpawlh rual leh him zawk hmanga lei tha hman bakah leilung nena inrem taka lo neih chu ngaihpawimawh a ni.

He huna thu a sawiah, Larsap General (Dr) Vijay Kumar Singh chuan thar tam duh avanga nasa taka chemical fertilizer leh rannung thahna hlo hman thin ten ram leilung leh hriselna thlenga nghawng tha lo a thlen thu sawiin, hemi laka kan him theih nan hian a taka ke kan pen chhuah a tul tawh a ni, a ti a. Prime Minister Pu Narendra Modi an National Mission on Natural Farming a lo tlangzarh tawh thu sawiin, loneih dan leh thar chhuah a lo him zawk theih nan leilung mila loneih kan chawilar deuh deuh a tul thu a sawi a. Thlai ten an mamawh khawp chaw tha an dawn theih nan lei endikna neih hmasak a pawimawh thu sawiin, hemi kawngah hian agriculture mithiamte chu thahnemngai taka loneitute pui turin a chah a ni. 

Larsap chuan Mizoram chu agriculture sector-a innghat nasa tak a nih thu sawiin, mithiamte leh KVK te rawn chunga theihtawp chhuaha hma kan lak phawt chuan ei leh barah kan intodelh mai bakah kuthnathawktute sum lakluh a pung thei dawn a ni, a ti a. Mizoramah tlangram loneih kan la kalpui thu leh loneitute chu tunlai thiamna chhuak thar hman tangkai dan zirtir zel a tul thu a sawi a. Thlai thar chhuah hralhna tha market linkage ngaih pawimawh a tul thu leh thlai hrisel leh ngaihhlutawm organic thlai thar chhuah tamah tan lak lehzual a tul thu a sawi bawk a. Khet Bachao Abhiyan chuan rah tha a chhuah ngei a beisei thu sawiin, duhsakna a hlan a ni.

Dr. Anupam Mishra, Vice-Chancellor, Central Agriculture University (CAU), Imphal-in 'Khet Bachao Abhiyan' chungchang a sawi fiah a. Buh leh thlai thar chhuah kawnga leilung leh mihring tana him lo hman thinte titlem tura tanlak mek zel a nih thu sawiin, Khet Bachao Abhiyan chhungin sawrkar laipui scheme pawimawh leh hman tangkai dan zirtirna kalpui a nih dawn thu a sawi a. Loneitute hmasawn zel nan tanrual a pawimawh thu sawiin, soil health card, kisan credit card, farmers' ID leh crop Insurance-te ngaihpawimawh deuh deuh a tul thu a sawi bawk.

He hunah hian Dr. Lalnuntluangi Hmar, Dean, College of Veterinary Sciences & Animal Husbandry (CVSc&AH), Selesih chuan kalkhawmte lawmna thu sawiin, CVSc& AH zirlai ten lemchan hmangin 'Khet Bachao Abhiyan' pawimawhna an entir a. Dr. K.P. Chaudhary, Principal Scientist & Head, KVK Aizawlin lawmthu sawiin hun hman a khar a ni.

Vawiin hun hman hi Agriculture and Farmers' Welfare Minister Pu P.C. Vanlalruata chuan a telpui a. Line department hrang hrang official-te bakah loneitute an tel a ni. 

Khet Bachao Abhiyan hmang hian chemical fertilizer, abikin urea hman leh hemia innghah nasat tih tlem tum niin, June thla chhung hian agriculture scientist, KVK official leh state aiawh ten seminar leh ataka entirnate neiin zirtirna an pe thin dawn a. Lo neih dam him leh hrisel zawk a awm theih nan kawng hrang hrangin hmalak a ni ang. Heng bakah hian hlawk zawka thlai thar tura lei hriselna hriat chian pawimawhnate bakah loneitu ten an tana duan hamthatna hrang hrang atanga hlawkna an hmuh theih dan turte inzirtir a ni bawk ang.