No.2809/2021-2022
Aizawl, the 30thOctober 2021 : Vawiin khan Mizoram Larsap Dr. Hari Babu Kambhampati chuan thuchhuah siamin Prime Minister Shri Narendra Modi leh His Holiness Pope Francis te vawiina Vatican City a an inkawmna chu mellung pawimawh tak ‘historic occasion' niin a sawi.
Hemi chungchanga thuchhuah a siamah Larsap chuan he hun pawimawhna chu tarlangin, khawvela mipui thlan tlin ram lian ber sawrkara Prime Minister leh khawvela Kristian Kohhran lian ber hotulu ber inkawmna chu history lehkhabua tarlan pawh a awm viau niin a sawi a. India Prime Minister leh Pope inkawmna chu remna leh muanna, mihring te inngeihtlanna leh sakhaw hrang hrang zuitute inhriathiam tawnna atan rahbi thar kaina nia a ngaih thu Larsap chuan sawilang.
Prime Minister Modi chu a hnathawhnaah leh mipui rawng a bawl naah mihringte harsatna tawh hrang hrang sutkian leh retheihna umbo chu a ngaipawimawh hle in hemi atan hian hma a la nasa a ti a. Hei hi Pope Francis’n Pope a nemngheh a nih hnua mipuite tana rawng a bawl leh hna a thawh dan nen pawh a inang hle tiin Larsap chuan a thuchhuah a tarlang a. Hruaitu pahnih te’na khawvela sik leh sa inthlakdanglam an vei tlan dan pawh a inang tiin hemi chungchangah hian ram hrang hrangte thawhhona a pawimawh hle niin a sawi bawk.
Larsap chuan India ram chu democracy huapzau leh huamzau nia sawiin Kristian sakhaw zuitu te chuan politics, films, sumdawnna leh ramri venhimna lamah nasa takin ram tan an thawhhlawk tiin India ramah Kristian Chief Minister pali lai an awm mek thu a tarlang bawk.
Larsap chuan Prime Minister kaihhruaina hnuaiah ‘Sabka Saath, Sabka Vikas, Sabka Vishwas, Sabka Prayas’ thupui hmangin ramin hmasawnna kawng chak takin a zawh mek tiin hmasawnna hnathawh hrang hrangin a rethei ber te pawh a thlen mek tih a sawi bawk.
