Mizoram Cabinet meeting hnuhnung berin sawrkar college atana lak a rem tih tak Mizoram Law College chuan vawiin khan zirlai tharte lawmna; Freshers’ Social chu anmahni college-ah an hmang a, Education Minister Pu Lalsawta’n khuallian chan changin a hmanpui a ni.

Minister chuan Dan leh Hrai zirna college changtlung tak Mizoram sawrkarin a Provincialised tak avanga a lawmpui thu sawiin, he college a zirlai te chu tih tak zetna rilru pu a ram leh hnam tana chhawrnahawm ni thei tura an zirlai zir ngun turin a chah a. Tunlai khawvelah dan leh hrai pawimawh dan tarlangin thuziak leh thusawi thlenga fimkhur a tul dan te a sawi a. He college-in result duhawm tak a neih thin avanga lawmpuina hlanin, zirlai chhuak mekte pawhin ram leh khawtlang mipui tana an thiamna hmang uar sauh sauh turin a fuih bawk a ni.

College Principal Dr. Rualkhuma Colney chuan Freshers’ Social bakah Provincialised lawmna hmang kawp an nih dan te sawiin, Mizoram sawrkar chungah lawmthu a sawi a ni.

Tun dinhmunah Mizoram Law College-ah hian Assistant Professor 4 leh part-time lecturer 5, Principal hovin an awm a, zirlai 293 an awm mek a, LLB zo tura result nghak (annual system) 6 awmin, he college atanga LLB degree nei tawh zawng zawng chu 298 an tling tawh a ni. Kumdanga an tih thin ang bawkin vawiin Freshers’ Social-ah hian kum 2012 leh 2013- a LLB zo mi 45 hnenah chawimawina Khuallian in a hlan a ni.