Vawiin khan Home Minister Pu R. Lalzirliana chuan Chawnpui Branch YMA Hall, Saitual-ah Labour Employment & Industrial Training Department hnuaia Labour Welfare Fund semna hun a hmang.

Pu. R. Lalzirliana chuan sorkar chu miretheite lamtang a nih ang ngeiin, an chanvo dik tak leh an hamthatna turte hlamchhiah an nilo tih a taka hmuhtheih a ni leh ta chu lawmawm a tih thu a sawi a. Mipuite chu rinawmna hmachhuan zel tura fuihin, sorkar hnuaia hamthatna leh tanpuina hrang hrangte chu diklo taka hlawkna tel tum lo tura chahin, taimakna leh rinawmna nena thawh chu a tlo ber thu a sawi bawk.

Sorkar flagship programme, NLUP chu kuthnathawktute leh dinhmun tleu te khaichhuaktu anih thu sawiin, tanpuina an dawn tawh leh la dawn turah pawh thahnemngai taka, hlawhtling ngei tura bei turin a fuih bawk.

Inkhawm hi Pi Lalsangpuii Hmar, SDO (C), Saitual chuan kaihruaiin, Pu C. Lalropianga, Addl. Programme Officer, Saitual Circle leh Pu Benjamin Lalnuntluanga, Accounts Officer, LE&IT Deptt. te hnen atangin thusawi ngaihthlak a ni bawk.

He hunah hian beneficiaries mi 294-te hnenah cheng 10,74,000/- semral a ni. Labour Welfare Fund hi inhlawhfa, hnathawktute tana duan niin, vawiina sem hi he fund hnuaia kum 2013-2014 chhung atana Children Education Scheme a ni a, member-te fate zirna chhawmdawlna atana pek a ni.