Vawiin chawhma khan Agriculture Minister Pu R.Lalzirliana hovin Mizoram Oil Palm Advisory Committee vawi 13-na Agriculture Department Committee Room-ah neih a ni.

Meeting-ah hian kum 2016-2017 chhunga Oil Palm chinna hmun tihzauhna atana hmalaknate, Fresh Fruits Bunches (FFBs) leh Crude Palm Oil (CPO) tharchhuah chungchanga district hrang hrang dinhmunte, kum 2017-2018 chhunga oil palm chinna tur hmun tihpun zat tur leh kum 5 chhunga Oil Palm tharchhhuah tam theihna tura hmalak dan turte sawiho a ni a. Mizoram Oil Palm Advisory Committee chuan Oil Palm chin kawnga company 3 Sawrkarin a thawhpui Godrej Agrovet Pvt. Ltd, Ruchi Soya Industries Ltd leh 3F Oil Palm Agrotech Pvt. Ltd hnathawh thlirletna neiin Ruchi Soya Industries Ltd leh 3F Oil Palm Agrotech Pvt. Ltd ten Oil Palm Mill bun tura an hmalaknate leh Oil Palm chi hnianghnar zawka neih dante leh Oil Palm chin kawnga harsatnate an sawiho bawk a ni.

Mizoram Sawrkarin Oil Palm chungchanga a hmalakna, Oil Palm Development Programme hi Public Private Partnership (PPP) mode a kalpui niin a tum berte chu:

Kuthnathawktuten sumfai tam zawk an hai luhna tur atana hmalakte;

Ram leilung hlutna lo tla hniam leh chhe zel tur ven leh ram ngaw humhalh chunga eizawnna ngelnghet zawk siamte;

Kumtin tlangram lo neiha eizawnna bansana, lo hmunnghet eizawnna tling siamte;

Oil Palm chingtuten kumtluana sumfai an hai luh theihna turte;

Mizoram ei leh bar leh sum dinhmunte Oil Palm chin hmanga siamthat a, ram leilung hman tangkaite a ni. 

He meeting-ah hian Agriculture Department changtu Parliamentary Secretary Lt. Col. Z.S. Zuala leh Pi Vanlalawmpuii Chawngthu, MLA bakah  Agriculture Department, Finance Department, Horticulture Department,  Commerce & Industries Department atangin Committee memberte, ICAR, Godrej Agrovet Pvt. Ltd, Ruchi Soya Industries Ltd , 3F Oil Palm Agrotech Pvt. Ltd hotute leh district hrang hranga District Agricultural Officer (DAO)-te an tel a ni.