Mizoram Police Media Cell, PHQ chuan a hnuaia tarlan ang hian Mizo thalai, China leh a bulhnai ram hrang hranga inhlawh leh hnathawka kal tum te tana hriattur pawimawh thuchhuah an siam :

“Tun hnaiah thalai ten China leh a bulhnai ramdang (Singapore, Malaysia leh Macau etc)-ah te inhlawh tur leh hna chi hrang hrang thawk tura kal kan ching ta hle a. Hlawh tam zawk hlawh tura ram danga kal chu thil duhawm tak angin lang mahse, him lohna tam tak a awm a ni. Kal duh luat avanga document diklo leh dan phalloh anga kal te, miin an bum avang leh chinchang hriat loh lutuk avanga dan bawhchhiaa kal te an awm thin a. Hetiang dan bawhchhia man chhuah, buaina khirh tak tak tawk hi an tam tawh a, an hnathawhna hmun atanga India rama awlsam taka thawn let theih an nih thin loh avangin harsatna tawk a tangkhang te pawh an awm thin a ni. Document dik lo leh siamchawp hman te, India mi tan Myanmarese Passport lem hman te hi dan bawhchhiatna lian tak a ni a. Heng mite hi Myanmar khua leh tui anga ram danga an kal tawh avangin harsatna leh buaina an tawh pawhin India mi an nih anga buaipui a harsa tawh a, a chhe ber pawh thlengin thihna hial an tawh  pawhin Mizoram a an ruang lak luh a theih tawh thin lovin a buaithlak em em a ni.

Chuvangin hetianga ram danga hnathawk tura chhuak turte chu fimkhur tur leh, document leh passport dik tak hmangin,  danin a phal ang thlap a kal hi keimahni himna a ni tih hria a, danin a phal ang thlapa kal thin turin Mizoram Police chuan thalai ram pawna hnathawk tura kal tum te kan ngen a ni.”