418/2023-2024

Aizawl, 12th May, 2023 : Vawiin khan Mizoram police leh FSL hmalakna in Forensic Science Laboratory ah National Crime Record Bureau (NCRB), Delhi atanga mi thiam lo kal ten Mizoram police-te hnenah National Automated Fingerprint Identification System (NAFIS) hman dan tur One-day training an pe. He hun hi Pu H.Sangchungnunga Director FSL in kaihruaiin, Khuallian Pu H. Lalengmawia, IAS Commisioner & Secretary Home Dept. chuan he training hi a hawng a ni. Training hi Mizoram district 11 atanga NAFIS khawihtu tur bik te hnenah pek a nih mai bakah Adamus University Kolkata Atanga Forensic Science a internship nei mek te pawh an tel ve phalsak a ni ni bawk.

NAFIS hi NCRB project pawimawh leh lian em em a ni a, a tum ber chu India ram pum a pawikhawihtute Fingerprint (kut zungtang thla) hmun khat a chhun khawm (database) a ni. National Automated Fingerprint Identification System hi khawl hmanga pawikhawihtute Fingerprint lakna leh dahthatna leh hnu chhui nana tangkai taka hman zel tura duan a ni. He project hnuaiah hian State NAFIS Center ah leh District tinah Fingerprint lakna tur khawl bun vek a ni bawk. Heng khawl te hi internet hmanga thlunzawm vek a nih avangin District tin a pawikhawihtute Fingerprint lak apiang hi National database, NCRB, Delhi-a vawn that turin awlsam takin a thawn nghal zel theih tawh a, Fingerprint case te pawh District NAFIS center atang hian State NAFIS centre, FSL a exam turin awlsam takin a thawn nghal zung zung theih tawh bawk.

Tun dinhmunah NCRB NAFIS ah hian misual nuai 80 vel Fingerprint vawn that a ni a, Mizoram pawhin pawikhawihtu fingerprint 6200 chuang hret a dahlut ve tawh a, hmasawn zel tura chak taka hma lak mek a ni.

NAFIS hi a tangkaina pawh hmuh chhoh zel a ni a, kar kalta pawh khan Delhi ah tu tih hriat loh ruang chhar a ni a, a fingerprint chu Delhi police lam ten NAFIS hmanga lo endikin Mizoram lama kan lo neih sa nen a inmil hlauh mai a, mitthi chu tu nge a nih tih an hriat theih phah ta a ni.