Mizoram pum huap ‘16th AMKA Mizoram State Karate Championship 2012-13’ chu vawiin khan Aizawl-ah neih tan a ni a, MJA President leh AMKA Senior Adviser ni bawk, Pu C.Lalrambuatsaiha-in Electric Veng YMA Hall-ah a hawng He Karate intihsiakna lian hi Mizoram State Sports Council (MSSC) hnuaia All Mizoram Karate Association (AMKA), General Headquarters, Aizawl programme pawimawh ber zinga mi a ni a; March ni 20-22, 2013 chhung hian Electric Veng YMA Hall, Aizawl-ah intihsiakna hi neih a ni ang.

He Karate intihsiakna Mizoram pum huap Championship lianah hian Mizoram District hrang hrang Karate Dojo/Club 12 atangin Karate infiammi mi 205, mipa 137 leh hmeichhia 68 an fuan khawm a; National Player tha leh International Player te pawhin an khel ve dawn nghe nghe a ni. Intihsiakna neih chhungin Referee & Judge 20 zelin, Chief Referee Shihan C.Dosavunga hovin intihsiakna hi an vil ang a, a duh apiang tan chhim theih a ni. Weight leh Age Category hrang hrang, Individual Events Kumite leh Kata-ah mipa leh hmeichhe tan Gold Medal 60 zet inchuh tura ruahman a nih bakah, Team Event pawh buatsaih tel tum a ni.

He championship hawnnaah AMKA President Pu R.Thanga pawhin thu a sawi a, AMKA General Secretary Pu R.Zomawia-in report a pe bawk. Intihsiakna hi ni 22.3.2013-ah khar a ni ang a, Pu C.Laltlanthanga, Secretary, MSSC hoin a kharna hun hman a ni ang. Vawiin intihsiakna hawnna inkhawmah Pu Robert Romawia Royte, Managing Director, North East Consultancy Services (NECS) leh AMKA Senior Adviser ni bawk chu Khualtha (Special Invitee) a ni bawk.