4799/2024-2025

Dated the 25th March, 2025 :  Nimin khan District hrang hrangah World TB Day hman a ni a.  Aizawl district ah pawh he hun hi Directorate of Health & Medical Education Auditorium ah Honble Minister Health & Family Welfare Pi Lalrinpuii hova hman a ni a. World TB Day hun hmannaah  hian  Aizawl DC Er. Lalhriatpuia chu Khualzahawm a ni. 

Khuallian Pi Lalrinpuii chuan TB natna chu khawvel huapin WHO chuan 2030 ah umbo a tum a, India ram chuan hei aia kum 5 a hma kum 2025 ah hian umbo a tum thu a sawi a. He umbo tumna hi a hlawhtlin theihna turin hmalakna hrang hrang Active Case Finding campaign te, TB Free village te, chaw tha hmanga TB damlo chhawmdawlna Nikshay Mitra te, Ni 100 chhunga TB umbo beihpui thlak mek te chu hmalakna langsar tak a nih thu a sawi. Pi Lalrinpuii chuan 2024 chhungin Mizoramah TB Free Village ni thei khaw 122 ngawt puan theih a ni chu a ropui takzet a ni a ti a. TB Free Village ni thei khua te hi a zawna he dinhmun chelh thei turin kumin chhung ngeiin tan nasa taka lo la turin a chah bawk.

Pi Lalrinpuii chuan TB chu mahni ngawta do a, umbo theih anih loh thu sawiin tanrual chu chakna anih angin kan tha leh zung seng khawm ila kan umbo thei ngei ang a ti.

Aizawl DC Pu Lalhriatpuia chuan Aizawl district chhunga 2024 chhunga TB Free Village ni thei khua te chu chawimawina a hlan bawk.

District hrang hrangah pawh World TB Day hi hman a ni a. Hetah hian TB Free Village a puan khua te chu chawimawina pek an ni vek bawk.

2024 chhunga TB dinhmun

TB exam zat        -    26343

TB hmuhchhuah zat    -    2313

TB HIV        -    270

MDR-TB        -     150

TB vanga thi zat    -    148

TB success rate    -    80%