Mizoram hi India ram state zing a ramngaw nei tha ber leh ramngawin a khuh that ber na ram ni a hriat lar mek a ni. Heng ramngaw te hi mipui te tan an tangkai em em a, a bik tak in thingtlang mipui te, heng ramngaw atanga an mamawh chi hrang hrang la thin te tan hian a hlu lehzual bik hle.

Mizoram CCF Planning and Chief Wildlife Warden thin, Dr. N.S Bisht khan a lehkhabu ziah ah khan Mizoram ramngaw atanga thil hlutna hmuchhuah zah chu kumkhatah cheng vaibelchhe 515.35 man hu niin a chhutchhuak a, a belhkhawm atanga hlutna tam ber cheng vaibelchhe 112.46 hi thing tuah tur lakkhawm atanga chhut a ni. Thingkung, thing ngul leh ban tur atan a lakkhawm zat hi cheng vaibelchhe 82.14 man hu a chhut a ni bawk.

Khuai, sava leh phengphehlep ten a thlai chi inthlah an puih na atangin cheng vaibelchhe 72.53 a chhut a ni a, ramngaw atanga chaw leh khawsakna kan lak chhuah zat hi cheng vaibelchhe 59.01 man hu ani bawk. Leimin tur leh leilung a ven that hlutna zat hi cheng vaibelchhe 52.7, sik leh sa inthlak danglam nasa lutuk tur lak a min ven naah cheng vaibelchhe 27.04, vawk chaw leh ran chaw tur atana hman ral hlutna zat hi cheng vaibelchhe 25.93, Ram hmul lakkhawm atanga sum lut zat hlutna pawh hi cheng vaibelchhe 25.14 a ni. Boruak a siamthatna leh mihringte hriselna atana a hlutna hi cheng vaibelchhe 16.95 a ni a, Rawtuai kan khawrhna atanga sum hmuh zat hi cheng vaibelchhe 15.28, ramngaw tan a tui mamawh tur zat a chelhna leh a pek kual zat hlutna hi cheng vaibelchhe 12.04, mau lakkhawm atangin cheng vaibelchhe 8.40, intihhlimna kan neih thin atanga a hlutna chu cheng vaibelchhe 2.31, natna hri thalo laka min venhimna kawng a a hlutna hi cheng vaibelchhe 0.57 a chhut a ni bawk.

Tunah hi chuan heng a hlutna te hi State economy atana chhiar tel ve ani lo a, achhan chu heng te hi “leilung thilthlawnpek” liau liau a ngaih vang ani. Khawtlang mipui te ramngaw humhalh tura zirtir hi a pawimawh em em a, heng bakah hian kan Open Forest (thing, hnim buk, hnim leh hlobet inpawlh ramngaw) neih te pawh hi hmasawn zawk tur a hman thiam a pawimawh hle. Mizoram ramngaw zing a hmun thum a then a hmun hnih hi Open Forest hnuaia awm a ni a, heng ramngaw atangte hian thil hlu lakchhuah a tam lem lo, hei vang hian kan Dense forest (ramngaw chhah tha) neih ho ten nasa tak in an tuar a, an hlutna pawh nasa takin a tlakhniam phah tawh hle a ni.