Vawiin khan Industry Sector hnuaia NLUP hmalakna kal zeah Lunglei khawpui chhunga Puanthui (Tailoring Trade) leh Puantah (Handloom) Trade thlangtute tana ni 3 chhung awh tur Workshop chu Lunglei DC Pu Abhijit Vijay Chaudhari-in a hawng a. He workshop hi DIC, Lunglei leh Mizoram Women Polytechnic, Aizawl te tangkawpa buatsaih a ni a. Training pe turin Polytechnic Lecturer pahnih Pi Susan R.Ralte (PG in Garment Manufacturing Technology, National Institute of Fashion Technology, New Delhi & M.Sc in Fashion Technology) leh Pi Lalthangpuii (M.Sc. in Fashion technology) te resource person niin anni hian ni 3 awh workshop-ah hian Lunglei khawpui chhunga thawmhnaw siamtute an zitir dawn a ni.
Workshop hawngtu Lunglei DC Pu Abhijit Chaudhari chuan Tailoring Trade hi mihringin a tel lova kan awm thei lo thil pathumte zinga mi a ni a, Industry Sector-ah pawh a pawimawh ber zinga pakhat a ni, a ti a. Lunglei District-ah Industry Sector hnuaia NLUP tanpuina dawngtu, 1st Phase atanga 4th Phase thlengin beneficiary 4,245 an awm a, chung zinga Tailoring Trade thlangtu mi 281 an awm thu a tarlang a. Mizoram POolytechnic, Aizawl atangin mithiam te lo kalin Lunglei khawpui hian Garment & Fashion Technology-ah training an pe thei tur chu a vanneihthlak hle a, khawpui dangte el pha tura tan la turin training-a tel turte a fuih.
General Manager, District Industries Centre, Lunglei Pi R.Lalrodingi pawhin thusawiin Lunglei District-ah hian NLUP beneficiary Tailoring thlangtu mi 281 leh Handloom Trade thlangtu mi 34 an awm thu leh Workshop hi beneficiary zawng zawng tana buatsaih a harsat avangin Lunglei khawchhunga mi 80 tan chauh an buatsaih theih rih thu a sawi a. Rampawn atanga thawmhnaw nalh tak tak lo lutte hi dang thei lo mahila, Mizo puanthui leh puantah ten a design leh technocloy-ah hma an sawn phawt chuan pawn lam thil chu an umchhuak thei zawk a ni, a ti bawk. DIC hmalakna leh Workshop huaihawt chungchanga Lunglei Bawrhsap leh District NLUP Coordinator ten an thlawpna chunga lawmthu a sawi a, rampum huap pawha thiamna chhuanawm tak nei resource person-te inpeknaah leh NIB leh Directorate of Industries te chungah pawh lawmthu a sawi bawk.
District NLUP Co-ordinator Pu Zathangliana pawhin thu sawiin a vawi khatna atan Lunglei-ah hetiang Workshop buatsaih a nih hi a chhimtute chuan an vanneihzia hriain tihtakzetna nen zir turin a fuih a. Workshop hawnna inkhawm hi Pu F.Lalsawmliana, IPO, DIC, Lungleiin lawmthu sawinain a khar a ni.
