Vawiin khan Chief Minister’s Conference Hall-ah Mizoram Road Fund Board (MRFB) chuan an chairman PWD changtu Chief Minister Pu Zoramthanga hovin an thukhawm a. Kumin 2019-2020 chhunga kawng enkawl, maintenance na tura sum hman dan tur rel a ni.

Chief Minister chuan kalkawng a that chuan economy hmasawnna a chak phah zawk avanga kawng tha neih a pawimawh thu leh, chumi atan chuan enkawl zuina -  maintenance lama tan lak tul a tih thu a sawi. Kawng thar siamna tur chu state sum in a tlin loh avangin pawn lam atangin sum mamawhte ngaihtuah thin ni mahse a enkawlna tur erawh state in a intum tur a nih avangin thahnem kan ngaih tlan a tul thu a sawi a. Chhiah lakkhawm atanga heng kawng enkawl leh siamthat hna te hi thawh a nih avangin fimkhur leh thahnemngai taka hmalak zel ni se tiin Chief Minister chuan a sawi.

Mizoram Road Fund Rules 2017 tlawh chhanin Mizoram State Road Fund Board hi din a ni a. Sum hnar hrang hrang atanga sum tlingkhawmte atangin Board kaltlang hian road division hrang hrangah maintenance hna thawh thin a ni. Kumin kum 2019-2020 chhung atan hian cheng vbc 50 dah niin, hemi atang hian vawiin meeting chuan cheng nuai 1138.28 chu normal maintenance work - kawngkhuar chhilh, leimin thenfai, kawng ko samfai, kawng bal leh culvert siamthat etc. atan te a hman tura dah in, cheng nuai 3722.44 chu kawng enkawl hna hautak zawk - resurfacing, strengthening etc. atan dah a remti a. Pradhan Mantri Gram Sadak Yojana (PMGSY) kawng enkawl zui zelna atan cheng nuai 139.28 dah a ni bawk.

Mizoram Road Fund Board (MRFB) hi kum 2017 khan din niin, PWD Minister chairman na hnuaiah din a ni a. Hemi hnuaiah hian PWD Secretary kaihhruaina hnuaiah Executive Committee a awm bawk a ni. MRFB huangah hian state budget hnuaia sum hmuh hmanna tur te, kawngpui tha zawk a awm theih nana ruahmanna siam te, kawng chhe zawk thuam thatna tura hmalakna tur ngaihtuahte a tel a ni.

Vawiin meeting-ah hian MRFB Vice Chairman, Chief Secretary Pu Lalnunmawia Chuaungo, Member Secretary, PWD Addl. Chief Secretary Pu J.C. Ramthanga, Adviser to Chief Minister Pu C. Lalramzauva leh member dangte an tel kim hle a ni.