2889/2022-2023
Aizawl, dated the 1st December 2022: Nimin chawhnu dar 3:00 pm khan Mizoram Sawrkar hnuaia ‘Working Committee for Roll out of 5G Network’ thutkhawm hmasa ber chu Chairman Chief Secretary Pi Renu Sharma, IAS kaihhruaina hnuaiah Chief Secretary Conference Room-ah neih a ni a. He State level committee thutkhawm vawi-1na ah hian Mizoram Sawrkar hnuaia ICT Department, Power & Electricity Department, UD&PA Department, Public Works Department, AMC leh department dang aiawh te bakah Department of Telecom, Govt. of India, COAI (Cellular Operators Association of India), DIPA (Digital Infrastructure Providers Association), Reliance Jio leh Airtel aiawh Official te an tel a ni.

India ramah 5G telecommunication network hmanga chak taka data thawnna leh inbiakpawhtheihna hi kumin 1st October 2022 khan Prime Minister in a lo tlangzarh tawh a, Mizoramah pawh Internet connectivity tha zawk leh 5G service kan hman ve thuai theih nan Mizoram Sawrkar chuan 31st October 2022 khan hma latu tur ‘Working Committee for Roll out of 5G Network’ a din a ni.

Meeting ah hian Pu Lalramsanga Sailo, ICT Secretary in Mizoram chhunga 5G service kan hman theih nan a bul tan dan tur leh department thawh ho tul na lai te a sawi a, Pu C. Lalhmachhuana, Director, NELSA, Department of Telecom, Govt of India pawhin presentation pein 5G Services chungchang leh Mizoram a hman a nih ve thuai theih nan a hmalak dan tur hrang hrang leh hmachhawp te a tarlang bawk. India ram khawpui engemawzat leh airport thenkhatah Reliance Jio True 5G leh Airtel 5G plus te hman tan mek a ni, India hmarchhakah Guwahati a lo thleng tawh bawk.

Vawiina 5G roll out Committee meetingah hian ‘The Mizoram Telecom Infrastructure (Amendment), Policy 2022’, duan mek chu a kaihhnawih Department leh Telecom Company/ Organization hrang hrang te nen sawiho nghal a ni. Telecom organization te nen March 2023 hmaa Mizoram hmun thenkhata 5G roll out dan tur ICT Secretary kaihhruaina hnuaiah an sawi ho leh thuai dawn a ni.