School Education Department-in High School naupangte tana Mizoram Secondary School Games 2014 October ni 28 leh 31 inkara a buatsaih chu vawiin khan hlawhtling taka zawhfel a ni a, Games kharna programme Ramhlun Sports Complex a vawiin chawhnu a buatsaih chu Parliamentary Secretary Pu Joseph Lalhimpuia’n khuallian niin a hmanpui a ni.

Pu Joseph Lalhimpuia chuan sawrkarin infiamna lamah pawh theihtawpin hma a la a tiin National School Games-a tithate hnenah incentive cash award Gold- Rs. 5,000/-, Silver Rs. 3,000/- leh Bronze - Rs. 2,000/-te chu Sawrkar-in a pek tum thu a sawi. Zirlai infiammite chu mahni inthunun a, ruihtheih thila fihlim tur leh taksa hrisel tha nei tura exercise te la zel tura chahin, taksa a hrisel chuan lehkha pawh tha takin an zir theih thu a sawi. Kumthar HSLC leh HSSLC examination-a topper-te chu sawrkar in Rs. 50,000/- a pek tum thu a sawi bawk.

He intihsiaknaah hian Aizawl District chuan Gold Medal 20, Silver Medal 7 leh Bronze Medal 6 lain a pumpuiah an champion a; 2-na Champhai District niin Gold Medal 8, Silver Medal 8 leh Bronze Medal 13 lain 3-na Serchhip District chuan Gold Medal 7, Silver Medal 6 leh Bronze Medal 10 an la bawk. Mizoram Secondary School Games ah hian zirlai infiammi mipa – 399, hmeichhia – 203 leh District/School aiawh zirtirtu 51, an vaiin mi 653 an tel a ni.