Vawiin chawhnu khan Mizoram Sorkar (Planning Department) leh EXIM Bank tangkawpin a buatsaih Seminar on 'Act East Policy - Cluster Based Export Development Strategy' ATI Auditorium-ah neih a ni a. He hunah hian Pu Lalmalsawma, Chief Secretary, Government of Mizoram chu khuallian niin, Pu Yaduvendra Mathur, Chairman and Managing Director, EXIM Bank chuan khualzahawm a ni.

Khuallian Pu Lalmalsawma chuan Act East Policy chungchang zirhona hun tha tak buatsaih a ni chu lawmawm a tih thu sawiin, India Hmarchhak State-te tan hmasawnna tak tak a thlen a beisei thu a sawi a. Ram dang nen insumdawnna thanglian zel tur chuan a kaihhnawih industry-te chu a mala kal lo in khaikhawm zawk a, “cluster based export development strategy” siam chu thil tha tak a ni tiin, Mizoram in a tangkaipui theih ngei tur thil a nih thu a sawi a. Mithiam ten zirchiangin Sorkar nen tang tlanga chak taka hmalak a tul thu Pu Lalmalsawma chuan tarlangin, thingpui, handloom leh thildangah kan siamchhuahte hi ram danga thawnchhuak thei tura inbuatsaih te, ramri hrula insumdawn tawnna chu formal trade-a kalpui vek theih dan ngaihtuah te leh State in kan mamawh leh tangkaipui tur transport, communication, tourism, health, leh banking leh insurance-ah te inthuamtha tura hmalak a pawimawh thu a sawi a. Chief Secretary rawtna angin EXIM Bank chuan "Impact of Act East Policy with special reference to Mizoram" tih zirbingna a nei dawn a, mithiam hrang hrang sawm khawmin report mumal tak Mizoram Sorkar-ah an thehlut dawn a ni.

Pu Yaduvendra Mathur, IAS, Chairman and Managing Director, EXIM Bank pawhin thu sawiin, Mizoram Sorkar-in tih tak zeta Act East Policy a ngaihven leh hamthatna awm thei zirchiang tura a sawm chu lawmawm a tih thu sawiin, Mizoram hmasawnna rahbi pawimawh tak paw chhuah tura zirchianna an kalpui tur thu a sawi a. Sumdawnna bultan leh kalpui mek tawhte puih a, hlawk zawk leh zau zawka an sumdawnna an kalpui a, Asia ram thneawmah te an inzarpharh theih nana bultan sak chu an tum zing ami anih thu a sawi a. Mizoram chu kalpawh harsa tak anih vanga sumdawnna leh hmasawnna kawng dang dangah pawh a hnufum thin anga kan ngaih chu a ni reng dawnlo ani tiin, ram danga thil siam chhuahte thawnchhuak thei turte tana loan leh sum lama puihna dang hrang hrang bakah training thlenga EXIM chuan puihna a pek theih thu sawiin, Kaladan Multi-Modal Transit Transport Project (KMMTTP) peihfel anih hunah phei chuan sumdawnna kawng a inhawng zau sawt dawn ani, a ti.

UNDP atang te, Mizoram University atang te, Mizoram Sorkar officials te leh zirlaiten he hun hi an hmang a. Pu Zothankhuma, Commissioner/ Secretary, Trade & Commerce leh Professor Lianzuala, Head of Department (Economics) ho in Mizoram tana Act East Policy a hlawk thei ang bera kalpui anih theih dan tur leh Central Government pawhin hma a lakna tur kawng hrang hrang an sawiho a ni a. Pu Vanlalruata Fanai, AGM, EXIM Bank atangain EXIM bank hnathawh tlangpui ngaihthlak niin, Pu John Borgoyary, Regioinal Head-NE India, UNDP chuan EXIM Bank nena Mizorama hna an thawh dun dan tur tlangpui a sawi bawk. Vawiin hun hi Pi Harleen kaur, IAS, ATI Director in lawmthu sawiin hun a khar a ni.

EXIM Bank hi India Sorkar hnuaia awm niin, importer leh exporter-te hnenah loan te pe in, ram dang nen insumdawn tawnna kaihhnawih industry-te tih hmasawn turin tanpuina a pe thin a. Khawvel pum huapa Office 8 an neih zingah pakhat chu Yangon (Myanmar) a ni a, India ramah chuan hmun 10-ah neiin, North East India-ah chuan Guwahati-ah an office a awm a ni. Sum lama tanpuina bakah publication siam leh training hrang hrang pawh pek thin a ni.