DIRECTORATE OF INFORMATION & PUBLIC RELATIONS, Government of Mizoram, India

4430/2024-2025

AIZAWL; the 25^th February,2025: Vawiin khan Mizoram Sorkar chuan CGTMSE (Credit Guarantee Fund Trust for Micro and Small Enterprises) scheme chungchangah SIDBI nen thawhhona thuthlung Memorandum of Agreement a ziak. Mizoram State Policy Coordination Committee Vice Chairman Dr. KC Lalmalsawmzauva hmaah MoA hi Commissioner and Secretary, Commerce & Industries Dr. Lalzirmawia Chhangte leh CGTMSE CEO Pu Manish Sinha ten P&PID Conference Hallah an ziak a ni.

CGTMSE hi Sorkar laipuia Ministry of Micro, Small & Medium Enterprises (MSME) leh SIDBI in MSME te tan Manufacturing leh service pek kaihhnaih eizawnna hrang hrang, lian tham si lo te’n an hmalakna atana sum mamawh phuhruk tura awlsam zawka loan an lak theih nan a ruahman leh kalpui a ni a. CGTMSE hnuaiah hian MSME loan la te chu an loan lak atanga 75-85% thleng guarantee pek sak a ni thin a; hemi atan hian loan la tu in fee a chawi a ngai thin. Bank lam tan risk a la san deuh avangin loan dilna tam tak hnawl a lo ni tawh thin a. SIDBI nena Mizoram sawrkar MoA hnuaiah hian Mizoram Bana Kaih (Handholding) Scheme 2024 atangin 95% thleng guarantee tih san a nih dawn bakah Mizoram sawrkar chuan Guarantee fee a tum sak vek dawn avangin dahkham leh guarantor ngai lovin awlsam zawkin loan a lak theih dawn a ni.

Vice Chairman Dr. KC Lalmalsawmzauva chuan vawiin MoA ziah naah hian Progress Partner-te bana kaihna tur hian Mizoram sawrkar chuan loan rul tha te chu loan pung an rulhna a rul let zel tur thu a sawi a. MoA ziah zawh hian CGTMSE chungchang sawifiahna presentation pek a ni.

MoA ziahnaah hian Partner Bank SBI, MRB, MCAB leh Finance Department aiawh te bakah Handholding Scheme hnuaia Nodal Officer te a tel a ni.

Attachment