186/2025-2026

Aizawl, the 16^th April, 2025: Vawiin khan Mizoram State Boundary Committee chu an Chairman Pu K. Sapdanga, Home Minister hovin Directorate of Forensic Science Laboratory Conference Hall, MINECO-ah a vawi 7-na atan an thukhawm a. Meeting-ah hian Revenue Minister Pu B. Lalchhanzova, Adviser to Chief Minister (Political) Pu Lalmuanpuia Punte, Chief Secretary charge la mektu Pu H. Lalengmawia leh Study Group on Assam-Mizoram Boundary memberte an tel a, Boundary Committee Member zingah ZPM, MPCC, AAP, BJP, MZP, MSU, CYMA, JAC on ILRFD aiawhte telin, ramri chungchanga mithiam sawm bikte leh Home Department official pawimawhte an tel bawk a ni.

Boundary Committee Chairman Pu K. Sapdanga chuan Member leh sawm bikte lawmna thu sawiin meeting koh a nih chhan leh thil pawimawh dangte sawifiah a, hemi hnu hian Chief Secretary charge la mektu Pu H. Lalengmawia’n keynote address a pe a, Pu Vanlalmawia Secretary, Home Department, Boundary Committee Member Secretary ni bawk leh Dr. Joseph K. Lalfakzuala, Convener, Study Group on Assam-Mizoram Boundary ten report an pe a ni.

Vawiin meeting hian tun thla April ni 25 (zirtawpni) a Guwahati, Assam-a Mizoram – Assam State Secretary-level meeting neih tur chungchang an thlirho a, Mizoram sawrkar atanga thu ken turte leh pawimawh dang chi hrang hrang an sawiho a ni. Mizoram – Assam State Secretary-level meetingah hian Mizoram sawrkar chuan Home Secretary Pu Vanlalmawia hovin palai mi 7 a tir dawn a ni.

Home Minister, meeting kaihruaitu ni bawk chuan ramri him tak, mipuite thlamuang taka an khawsak theihna tur nawr chhuah chu an thupui ber a nih thu sawiin, Mizoram tana channa awm lo tura theihtawp chhuah a nih thu a sawi a, Mizoram-Assam ramri zirchiang tur Study Group member 4 awmna pawh January ni 25, 2024 khan din a nih thu sawiin, he Study Group hian chhuanawm takin hma an la a, anni zarah document tanchhan tur pawh kan nei tha tawk tawh hle in kan inhria a ni, a ti a. Mizoram aiawha ramri chungchang inbiakna a palai kalturte pawh an inpuahchahna a tha thawkhata a hriat thu sawiin, Mizoram tan theihtawp chhuah turin a fuih bawk a ni.

Boundary Committe thutkhawm hmasa ber hi July ni 30, 2021 khan neih a ni a, thutkhawm vawi 2-na hi September ni 7, 2021 khan neih niin a vawi 3-na chu November ni 17, 2021 khan neih a ni a, a vawi 4-na September ni 9, 2022 ah neih niin, a vawi 5-na hi January ni 20, 2023 khan neih a ni a, a vawi 6-na chu January 25, 2024 khan neih a ni. Tun tum hi Mizoram sawrkar thar a pian hnu a thutkhawm vawi 2-na a ni.