187/2025-2026
Siaha the 16th April 2025: Addl District Magistrate, Pu Abraham Beirazi Khithie chuan tunlai State danga Ui a hri (Rabies) leng mek chungchangah khuahkhirhna thupek a hnuai tarlan ang hian a chhuah.
ORDER
Kan hriat theuh angin tunlai hian kan thenawm State Manipur ah nasa takin Ui a hri (Rabies) a leng mek a, thupek chhuah a tula hriat a ni a. Chuvangin, kei, Abraham Beirazi Khithie, Additional District Magistrate, Siaha District hian Section 163 of BNSS, 2023 in thuneihna min pêk angin, ui a hri (Rabies) laka Siaha District mipuite kan lo him nan hetiang hian thupêk ka chhuah e:-
1) Siaha District ah ramdang atangin ui lakluh khap tlat a ni.
2) Ui damlo leh thi an awm a nih chuan AH & Vety Office ah hriattir vat tur a ni.
3) Ui vulhtu te'n an ui vulh chu Anti-Rabies Vaccine (ARV) an laktir vek tur a ni.
4) Ui vulhtu te'n an ui vulh chu khawlai ah an chhuah zalen tur a ni lo. Tin, khawlaiah an chhuahpui dawn a nih chuan hrui/chain rinawm tak hmangin an kai tur a ni.
5) Ui khuahkhirhloh in mihring a seh a nih chuan Section 291 BNS 2023 hmangin ui neitu chu thlaruk (6 months) chhung lung in tan emaw Rs. 5000/- thleng chawitir a ni ang.
He thupêk hi tihdanglam a nih loh chuan thla hnih (2 months) chhung a huam ang a, zawmlote chu Section 223 of BNS 2023 dân hmanga hrem an ni ang. He thupêk hi nemnghetin vawiin Dt. 15.4.2025 hian hming ka ziah hnan e.
