Vawiin khan Mizoram State Law Commission Chairman Office, New Capital Complex-a an building dinglai chunga sak thar chu hawn a ni a. He hun hi State Law Commission Chairman Pu John Siamkunga’n kaihruaiin, Law & Judicial Minister Pu Lalsawta leh Deputy Speaker Pu R. Lalrinawma ten an hmanpui.

Pu Lalsawta chuan Law Commission in office thar an nei chu a lawmpui thu sawiin, mipui rorelna ramah chuan Dan mumal tak a neih a tul zia a tarlang a. Milian emaw, mite emaw pawh ni se tumahin dan hi an bawhpelh a thiang lova. Chutihrualin dan hman tangkai theih tawh loh tur te paih a, kan la mamawh tur te leh siambelh ngai tur te ngaihtuah a zirchian a tul bawk a. Hemi atan hian Law Commission hi a pawimawhin, ram rorelna tha leh muanawm kan neih theihna hnar pawimawh tak a ni, Law & Judicial Minister chuan a ti.

Deputy Speaker, Law Commision Chairman lo ni tawh thin Pu R. Lalrinawma chuan Law Commission Mizoramin kan nei hi kan vannei hle a ni, a ti a. He Commission hian hna tha takin a lo thawk tawh thin a, amaherawhchu mipui lamin a pawimawhna kan la hre tawklo hle a. Kan hman tangkai a kan hlut thiam a ngai a ni, Deputy Speaker chuan a ti.

Pu John Siamkunga chuan Office mi leh sa te chu office atanga ram rawngbawltu an nih angin an hnathawhna hmun chu dimdawi taka enkawl chungin theihtawp chhuaha thawk turin a sawm bawk a ni.