No.138/2021-2022

Aizawl the 14th April, 2021: Vawiin khan Mizoram State Library Internet Center chu Art & Culture Department Director Pu R. Hmingthanzuala’n a duh leh mamawhtu apiang ten an hman theih turin a hawng.

He Internet Center hi tangkai taka hman a nih theihnan Developing Library Network (DELNET) hnuaiah Membership registration tih a ni a. DELNET hian International full text e-books, e-journals , e- manuscripts , e- articles subject hrang hrangah neiin, heng E-resources te hi an website atanga enleh download theih a ni. DELNET hian Inter Library Loan (ILL) an kalpui bawk a, hmun hrang hranga Library awmte lehkhabu in hawh tawn theihna niin, he facility pawh hi tangkai tak a hman chhoh tum a ni.

Director hian Web OPAC a tlangzarh nghal bawk a. Mizoram State Library hi kum 2014 khan LIBSYS software hmanga computerized zawh fel a ni a, library-a lehkhabu awm zawng zawngte OPAC atanga zawn theih niin, tunhmaa library atang chauha zawn theih ni thin kha, Internet kaltlangin Mizoram State Library website www.statelibrary.mizoram.gov.in ah lutin khawi hmun atang pawhin he Web OPAC hi a access theih tawh dawn a ni.

Mizoram State Library hi New Capital Complex, Khatla-ah awmin, tunah hian Library Member naupang 1173 leh puitling 6275 an awm a. Lehkhabu 68673 an nei bawk a ni. Tlawhtu hi kum 2019 khan mi 4470 an awm a, nikum 2020 khan tlawhtu 1577 an awm bawk a ni.