4278/2024-2025

Aizawl the 17th February, 2025 : Vawiin khan State Medicinal Plants Board (SMPB) Mizoram Executive Body chu an Chairman Pi Lalrinpuii, Minister, H&FW Dept. kaihhruaina hnuaiah an thukhawm. He thutkhawmnaah hian ramhmul damdawi chungchanga hmalakna te thlirho a ni a, hmalak chhunzawmna tur hrang hrang sawi ho a ni bawk.

State Medicinal Plants Board Mizoram leh Research Scholar MZU-te tangkawpin Mizoram chhung a district paruk (6)-a ramhmul damdawi zirchian leh chhinchiah (documented) tawhte chu lehkhabu a chhuah turin Executive Body hian a rel a. Ramhmul damdawi chungchanga zirchianna (Research & Development) pawh nasa lehzuala kalpui an rel a ni. Ram tana rotling “Herbal Garden of State Importance” project pawh ti hlawhtling ngei tura hmalak chhunzawm a rel bawk.

State Medicinal Plants Board hi National Medicinal Plants Board, Ministry of AYUSH, Govt. of India chuan State tina ramhmul damdawi ti changtlung tura ruahmanna a siam angin October 1, 2001 khan Mizoramah din a ni a. Kum 2015 atang khan AYUSH Department hnuaia seng luh a ni.

State Medicinal Plants Board (SMPB) Mizoram hian ramhmul damdawi chinpun, humhalh, a chungchang inhrilhhriat leh kawng hrang hranga ti changtlung turin hma a la thin a ni.

He meeting-ah hian State Medicinal Plants Board Mizoram Executive Body-a ramhmul damdawi kaihhnawih department hrang hrang aiawhte leh zirna inpui (MZU, RIPANS) aiawhte atangte in member an kal tha hle.