Vawiin khan Planning & Programme Implementation Department hnuaia Entrepreneurship Development Centre (EDS) buatsaih Mizoram State Outstanding Entrepreneurs’ Award sem a ni. Award semnaah hian Home Minister Pu Lalchamliana chu khuallian a ni a, Chief Secretary Pu Lalnunmawia Chuaungo chuan a kaihruai a ni.

Khuallian Pu Lalchamliana chuan thu sawiin, Mizoram State Outstanding Entrepreneurs’ Award dawngtute zawng zawng hnenah lawmpuina leh duhsakna a hlan a, midangte tana malsawmna thlentu an ni, a ti a.  Minister chuan Entrepreneur te hian chungkua enge maw zat eizawnna siamsakin, Mizoram mipui tan an thawk hlawk em em a ni, a ti a.  Mizoram in statehood a neihna la reilo mah se, kawng tam takah hmasawnna state in a nei tawh a ni, tiin a sawi a. Khuallian chuan sawrkar hna hian mi zawng zawng a daihloh avangin mahni kut kawia din tum chu thalaite tan thil tih makmawh a ni tawh a, hemi kawngah hian thalaite penchhuak zel turin a ngen a ni. Handloom, Handicraft, Ei Siam leh thil tam takah hmalakna tur a awm a ni, a ti a. Khuallian Pu Lalchamliana chuan Sawrkar pawhin Entrepreneur Scheme hi a ngai pawimawh a, SEDP nen pawha inkawp rem a ni, a ti a.  Khuallian Pu Lalchamliana chuan Entrepreneur ni turin thiamna bituk a awmlo a, kum bithliah a awmlo a, hun bi tuk a awm lo a, a taima a piang an dikchhuak thin a ni, a ti a. Khuallian chuan a bul tan that chu a chanve zo a ni tih a ni a, amaherawhchu tawp thlenga tha taka thil tih hi a pawimawh lai zawk hi a ni, tiin a sawi bawk a ni.

Mizoram State Outstanding Entrepreneurs’ Award dawngtute:
Mizoram State Outstanding Entrepreneur, 2019- Pu C.B Lalliankhuma (CB Rice Cake)
Mizoram State Outstanding  Women Entrepreneur, 2019- Pi Laltanpuii (Zozia)
Mizoram State Outstanding Entrepreneur, 2019- F.Hrangvela (F.Hrangvela Group of Industries)
Mizoram State Outstanding Entrepreneurs’ Lifetime Achievement Award dawngtute:
Zonunsang Handloom
Hmingliani Bakery

Chief Secretary leh Mizoram Entrepreneurship Development Monitoring Committee (MEDMOC) Chairman ni bawk Pu Lalnunmawia Chuaungo pawhin thu sawiin, Mizoram in EDS mumal taka a neih tanna chu 18th January, 2017 a ni, a ti a. Hmalatu leh sulsutu leh sawrkar hmalakna te lo endika hmalama lokal tir tu tur atan MEDMOC chu din a ni, a ti bawk a. Pu Lalnunmawia Chuaungo chuan sawrkar chu mipuite tana kawng kawh hmuhtu leh dan leh hrai siamtu a ni, a ti a. Chief Secretary chuan lehkha zir lai atanga entrepreneur chungchang ngaihven turin leh hlawh neia midangte hnena inhlawh nilo a, midangte hlawh neia ruaitu nih tum turin zirlai leh thalaite a ngen a; Central Service leh Exam harsa deuhte chu a tuimi leh ti mi bik awm a ni, a ti bawk a ni.

Award hi tehna hrang hrang Business bultan dan, hmasawn dan, hnathawk chhawr zat, sum bul tan dan, lakluh zat leh sum dinhmunah te teh a ni a, endiktu panga- Pu Zonunsanga Khiangte, President MJA; Pu K.Lianhmingthanga, President, MCIC; Pu V.Lalrinawma, Deputy Director, Commerce & Industries; Pu Rinzuala, Expert Member, MEDMOC; Pu Saihlira, Principal, Adviser, Planning & Programme Implementation Department te an ni. He award semma hi HYVE, Aizawl City Hall, Tuikual South-ah neih a ni.