North East Cultural Centre, Ministry of Culture, Government of India leh Art & Culture Department, Mizoram tangkawp-in an buatsaih India puma FAINA beihpui thlak mek Swachh Bharat Abhiyan programme chu nimin (29.10.2019) khan Aizawl hmun hrang hrangah hman a ni a. He programme hi Fai tura inzirtirna drama khawlaia entir (Street Play) hmangin neih a ni a, Pu F. Lalthanmawia, Archivist, Mizoram State Archives chuan khuallian niin a hmanpui a. Zopar Drama Club, Republic Vengthlang Branch KTP-te chuan “Thawk reng la, fai reng rawh” (work and be clean) tih Drama B. Lalzawmliana, Republic Vengthlang ziak chu Aizawl khawpui chhung khawlai hmun hrang hrangah changin mipuite hnenah zirtirna an pe a ni. Swachh Bharat Abhiyan Street play changtu Republic Vengthlang-te hi Aizawl khawpuia veng fai bera thlan mek an niin a zawin kum 6 chhung veng fai thlan zingah an tel tawh a, kum 4 chu pakhatna niin kum 2 dang chu pahnihna an lo ni tawh a ni.