Chibai.

State puitlinga Mizoram hlankai a nih, Mizoram Statehood Day pualin inzavaiin chibai ka buk che u a, lawmpuina ka hlan a che u.

Tun ang hun February ni 20, 1987 khan Mizoram chu India ram State 23-na ni tura hlankai niin, he ni pawimawh tak hi Mizoram tana hmasawnna, remna leh hlawhtlinna tura bultanna thar duhawm tak a ni.

He ni hi tuarchhelna, inpumkhatna leh Mizo mipuite beiseina ataka chantirna leh nemnghehna a ni a. Inbiakna leh mipui thlan rorelna kaltlanga hnehna lantir niin, hemi avang hian Mizoram Peace Accord chu June ni 30, 1986 khan India Sawrkar leh Mizo National Front te chuan an ziak a; hei hi India ram chanchina inremna hlawhtling bera ni hiala ngaih a ni.

State a hlankai a nih hnuah Mizoramin zirna, hriselna, hmasawnna ruhrel siam leh nitin khawsak kawngah hmasawnna chhinchhiah tlak tak tak a nei a. Kan hnam ziarang hausa takte, nunphung nghet tha tak bakah, lungrual leh inpawh tlang taka kan khawsak honate hian ram pum a fan hneh hle a ni.

He hunah hian Sawrkar laipui program, India ram State leh Union Territory hrang hranga chengte inkara inhriatthiamtawnna leh inpumkhatna tizual deuh deuh tura hmalakna, 'Ek Bharat Shreshtha Bharat' chungchang hi sawilan ka duh a. Hei hian hnam hrang hrangte inkarah inunauna leh inpumkhatna siam a, India khua leh tui kan nihna tihfiah zual a tum a ni.

Hetiang a nih avang hian India khua leh tuite inpumkhatna tura hmalakna, 'Ek Bharat Shreshtha Bharat' thil tumte hre reng chungin, midangte hnam ziarang leh nunphungte inngaihven saka inzirtawn turin ka sawm vek che u a. Mahni hnam ziarang leh nunphungte hloh then chuang hauh lovin hnam inpumkhatna hi a kalpui theih reng a ni.

He ni chhinchhiah tlak tak kan lawm mek rual hian Mizoram leh India ram chak leh hlawhtling zawk siam turin intiam thar leh theuh ila, ram leh hnam rohlute vawnghim chung zel leh, chhuan lo la awm turte hmakhua ngai chung zelin lungrual takin hmasawnna hna i thawk tlang zel ang u. India rama cheng hrang hrangte hnam ziarang leh nunphungte zaha vawnghimtu mai bakah, India ram chu kum 2047-ah ram changkang leh intodelh 'Vikshit Bharat' ni tura hmalakna kawngah theihtawp chhuah theuh turin ka sawm a che u. 

Ka lawm e.