3712/2023-2024
Aizawl, the 7th February 2024: Traffic Police te'n an duty hmun atanga nitina an thil tawn leh hmuh thinah te Lirthei khalhtute an fimkhur a ngai hle in an hria a. Traffic Duty te report pek bawhzuina atan, Pu Stephen Lalrinawma, Sr SP Traffic chuan a hnuaia tarlan ang hian lirthei khalhtute tana zawm tur thuchhuah a siam.
Lirthei khalh, a hman dan leh enkawlna kawngah lirthei neituten hma kan sawn zel a. Amaherawhchu, traffic dan leh hrai hriat loh avangte, ngaihithah hrim hrim leh fimkhur tawk loh avanga chesual leh man tawk kan awm fo thin a, hemi kawngah hian tan la thar zel turin lirthei neitute kan infuih thar a ni.
Kan ramah Two Wheeler; a bik takin Scooty hman theiha a awm tak hnuah hian lirthei khalhtu zingah hmeichhia kan pung nasa hle a. Nu in an fate paw chung leh two wheeler (private & commercial) ah bawr tak taka school naupang phur hmuh tur kan awm ta fo mai a, tin kan naupang phurh lai lo muthlu ta mai te pawh hmuh tur an awm fo thin. Heng avangte hian Two Wheeler khalhtuten anmahni leh an mi phurhte himna ngaihtuah reng thin turin kan inngen a ni.
Tin, tunlai Car chhuak thar thenkhatah a chung khuhna (sun roof) hawnga lirthei tlan laia naupang dak chhuak leh thu chhuak hmuh tur an awm ta fo bawk. Tlangram kawng zim/te leh kawi tak taka lirthei khalh kan nih avangin hetianga naupang an thu chhuak leh ding lawr mai thin hi a him lo hle a. Nu leh pa ten kan tu leh fate himna ngaihtuaha hetianga chuantir lo turin kan inngen a ni.
Naupang himna ngaihthah taka lirthei khalh hi The Motor Vehicles (Driving) Regulations, 2017 Regulation 5 (8)-in lirthei khalhtute mawhphurhna a duan bawhchhiatna a ni a, Section 177 of The MV (Amendment) Act, 2019 hmanga hrem theih a ni.
Tin, lirthei neitu zawng zawng ten lirthei an kalsan dawnin emergency-a biak pawh theihna tur phone number lirthei ah dah theuh turin kan inngen bawk e.
