Mizoram Upa Pawl (MUP) General Assembly vawi 38-na chu vawiin hian Vanapa Hall, Aizawlah hman a ni a, Social Welfare Minister Pu PC Lalthanliana chu Khualllian a ni. MUP General Assembly hi MUP General Headquarters President Pu H.Raltawna’n a kaihruai a ni.
Khuallian, Social Welfare Minister Pu PC Lalthanliana chuan thu sawiin MUP member ni hman lova boral tamtak an awm laiin MUP member ni theia damrei te chu an vanneih zia an hriat a pawimawh tih a hrilh a; chhungkua leh khawtlanga upa te pawimawhna leh hlutna hrang hrang sawiin kum lama upa te ngaihsakna hi ram changkanna tehna pakhat a ni a ti. Ram changkang zawk USA, UK leh Japan-ah te kum za (100) tling an ngaihhlut dante tarlangin Mizoram sorkar pawhin upa te a ngaisang a, a ngaihsak a; Social Welfare Department chuan kumin Upa te Ni (1st Oct,2010)-ah Mizoram chhunga kum za tling zawng zawngte hnenah chawimawina certificate leh Rs. 1000 a pe vek dawn a ni a ti bawk. Tar chawmna (Old Age Pension) pawh Mizoram sorkarin a ngai pawimawh em em a, a dawng tur diktakin a rang thei ang bera an dawn zel theihnan sorkarin hma a la a; chutih rualin state sorkar sum harsatna avangin duhthusama kalpui theih a la ni lo chu pawi a tih thu a sawi a, ram dinhmun mila enchhoh sak zel tum a ni a ti. Khuallian chuan Mizo thawnthu leh Mizo hnam nun ze mawi chhawm nun zelnan MUP chu pawl pawimawh ber a ni tih sawiin thiltha duhna avanga rawtna leh sawiselna te dawng turin sorkar a inhawng a, upa te inthlahrung lo tura fuihin Pathianin tar tawh tak Josua a kohna a sawi lang a,  Assembly hmanga MUP member kalkhawmte chu ram lak tur an la ngah zia a chah nawn bawk a ni.

General Assembly-ah hian MUP Gen. Hqrs President Pu H. Raltawna IAS (Rtd) chuan upa te hi an tu leh fate leh ram tana thurochhiah leh ruahmanna siamtu an ni tiin, taimakna, rinawmna leh inremna te nunpui a sawi darh turin MUP member kalkhawm te a fuih. Intodelhna hi MUP in a ngaih pawimawh ber pakhat a ni tih tarlangin kan intodelh phahna tur a nih phawt chuan tlangram lo neih leh lo hal te hi a zahthlak lo a ni a ti a, intodelhna tur a nih chuan awmze neia tlangram lo neih te pawh NLUP trade ah sorkar-in telh ve se a duh thu a sawi bawk.

MUP hian Sub. Hqrs 6 a nei a, unit 557 a awm a, Mizoram pawnah unit 13  a awm bawk a,  member zawng zawng zat hi 50,500 a ni. Tun dinhmunah hian National Old Age Pension Scheme (NOAPS) atanga pension dawng mi 10,525 awmin Indira Old Age Pension Scheme (IOAPS) atanga pension dawng mi 4,991 an awm a, IOAPS atanga pension dawng tura sorkarin a pawm tawh mi 8,231 an awm bawk.

MUP General Assembly vawi 38-na ah hian member an kal tha hle a, kum 90 chung lam pawh 11 lai an tel a ni. Chawhnu lamah rorel inkhawm hun hmangin kum 80 chunglam te chawimawina hun hman a ni.