New Economics Development Policy (NEDP) Study Tour nei turin Hrangturzo Assembly Constituency huam chhunga Mizoram Upa Pawl member 20 te chuan vawiin chawhnu dar 1:00 khan Serchhip an chhuahsan a, Pu K. Saitluanga, DIPRO Serchhip chuan I&PR Office tual atangin a vailiam.

Mizoram sawrkar Flagship Programme lian ber New Economics Development Policy (NEDP) Study Tour nei turte thlahna hun tawi DIPRO Office-a neih ah Pu K. Saitluanga,MIS, DIPRO Serchhip District chuan thu a sawi a, ram hmasawnna tura thil pawimawh tak pakhat chu ram rorelna enkawltu sawrkar leh a hnathawkte leh ram mipuite inkara inpawhtawnna tha, thawhona tha leh inlaichinna tha anih thu sawiin, ram mipuiten sawrkar hmalakna an hriat ve vek a pawimawh ani, a ti.

Sawrkar chuan New Economics Development Policy (NEDP) hnuaiah hian Mizoram Upa Pawl te kum kalta khan a lo zin tir tawh a, tun hi a tum hnihna niin tum khat dang buatsaih leh tura ruahmanna siam mek a ni bawk a ni.

Vawiina Hrangturzo Assembly Constituency huam chhung atanga MUP Study Tour nei turte hi I&PR Department hotuten Aizawlah an lo dawng sawng ang a, hmun thlan bik engemawzat an lo tlawh kual pui dawn a ni.