1893/2023-2024

Aizawl 15th September, 2023: Vawiin khan Pu TJ Lalnuntluanga, Transport Department changtu Minister chuan Directorate of Transport, Tuikual Aizawl-ah Transport Department hnuaia Mizoram chhunga Vehicle Location Tracking & Emergency Alert System (VLT & EAS) Control and Command Centre chu khuallian niin a hawng a. Khawthlangtuipui leh Tuichawng Lui inkar KM 23-a Inland Water Transport (IWT) Project kalpui tur lungphum a phum bawk.

Khuallian chuan thu sawiin kan ramin inkalpawhna tha tlawm zawk IWT lungphum a ni chu lawmawm a ti a, transport department thawktute inpekna leh thawhrimna fakin lawmthu a sawi. Vawiin atang zelin theihtawp an lo chhuah zel angin tun huna awmte'n kan chhunzawm a, kan theihtawp kan chhuah ve hi kan ramin a mamawh ber a ni a. Kan nunau chak lo zawkte humhim nan hetiang ang emergency button leh motor thlen chin Tracking-na hmanrua hawn a ni chu kan ram hmasawnna bul a nih ngei a beisei thu a sawi. Kan ram tan mellung pawimawh tak a ni a, passenger phur motor driver te'n fimkhur takin an awm phah anga, kan him phah bawk dawn a. Kan Police te pawh hnuchhui nan a pui thei bawk dawn a ni a ti.

Luidung 16, forest department-in an humhalh mek a, kan ram lui zawng zawngte IWT atan hman tangkai theih ni lo mahse a theih tur luiah in-concentrate a, hlawhtlinpui turin hmalak zawk ni se tih a nih thu a sawi a. Techno feasibility survey Chhimtuipui-ah pawh kalpui mek a ni tiin kan ramri buaina avangin he IWT Project hi ngaihpawimawh lehzual a ni a, a hlawhtlin nachhan pakhat pawh a ni a ti. Ei leh bara kan intodelh nan leh kan thenawm ramte nen insumdawng tawnna tur a tana tangkai tak a nih ngei a beisei thu sawiin kan tu leh fate tan pawh hmalam eng tak buatsaihtu ni ngei se a duh thu a sawi bawk.

Pi Lalmuanawmi, Transport Project Coordinator, NIC, Aizawl chuan VLT & EAS chungchangah Technical Report a pe a, 2012-a Delhi-a Bus chhunga pawngsualna rapthlak tak thleng ‘Nirbhaya case’ thil thleng avang khan India sawrkar chuan passenger te, a bikin hmeichhiate himna tur ngaihtuahin Morth chuan kum 2016 khan Central Motor Vehicle Rules (CMVR)-ah thuchhuah a siam a. Vehicle Location Tracking Device (VLTD) leh Emergency Alert Button chu passenger phur motor ke pali leh a chung lam nei January ni 1, 2019 hnulama register-ah vuah vek tura tih a ni. VLT & EAS Chuan two wheeler leh three wheeler (auto-rickshaw) a huam lo a, State parukah Mizoram tiamin India ramah hman tawh a ni. He Project hnuaia hian NICSI (National Informatics Centre Service Inc.) Ministry of Electronics & Information Technology, Govt. of India kaltlangin thawktu mi 15 dah a ni a, Command and Control Centre-ah hian ni 1-ah darkar 24 chhung thawktu awm tura ruahman a ni. He project thiltumte chu:

Hmeichhia leh naupangte passenger phur motora an him zawk nan,
Passenger Vehicle-a harsatna tawk te'n awlsam taka tanpuina an koh theih nan,
Passenger Vehicle awmna hmun awlsam taka hriatna leh chhui zung zung theihna,
Rang taka Emergency Response Support System (ERSS) Team, Police Department hnena hriattir a nih theih nan bakah Vehicle Location Tracking Device leh Emergency Button te chhui bakah enthlak theihna tur monitoring centre siam te a ni.

Lirtheia harsatna tawk- pawngsual, insuam/inrawk, accident eng pawh thleng se Panic Button an hmeh veleh Command & Control Centre leh ERSS (Police Department)-ah alert thlengin, harsatna thlenna hmun an chhui chhuakin, hma lak zung zung theih a ni dawn a ni. VLT Device hian Command & Control Centre-ah Motor a nun chuan lirthei dinhmun a thawn reng a. Motor awmna, tlan chak zawng, Signal dawng tha lo, device tihchhiat tum, SIM Card nung tha lo te a hriat theih a ni.

Tunah hian passenger phur motor thenkhatah leh Transport Department, Govt. of Mizoram MST BUS-ah te Panic Button hi dah an ni tawh a ni.

Pu Lalnunthianga, Asst. Director, Transport Department chuan report pein Khawtlangtuipui – Tuichawng Lui Inland Water Transport chu Ministry of Ports, Shipping & Waterways, Govt. of India chuan Cheng 22.93 Cr. DPR (Detail Project Report) an siam chu pawm a ni tawh a ti a. Phase-I atan cheng 6,17,86,000/- sanctioned niin cheng 1,23,57,000/- released tawh a ni. Phase-I-ah hian KM 6, Kawrpuichhuah/Thegaduar (Bangladesh border) atanga Tlabung inkar a ni. M/S Coastal Consolidate Structure Pvt. Ltd. Vijayawada, Andra Pradesh te'n he project hi an thawk dawn a ni. Phase-I hnathawh tur atan hian Forest Clearance pawh Dy. Inspector General of Forest (C), Shillong atangin phalna hmuh a nih tawh thu ngaihthlak a ni bawk.

Command and Control Centre hawnna programme hi Pu R. Lalchhanhima, Addl. Secretary, Transport Deptt.-in kaihruaiin kalkhawmte lawmna thu a sawi a, Er. R. Lalrammawia, Director of Transport chuan lawmthu sawina hun a hmang a ni. He hunah hian Aizawl SP Traffic, Lirtheia eizawng pawl hrang hrang, thutharthehdarhtute bakah sawmbikte an tel a ni.