1894/2023-2024

Aizawl the 15th September, 2023 : Vawiin khan Mizoram General Election 2023 atana Returning Officer leh Asst. Returning Officer ni tur ten Evaluation Programme neiin paper chi 2-ah exam an hmachhawn.

He exam hi Election Commission of India (ECI) ruahman niin online-a kalpui a ni a, paper hmasa zawkah zaa 80 chhan dik ngei ngei a ngai a, paper dangah zaa 50 tal tihdik a ngai a, exam hun chhung hi darkar chanve a ni. He exam paltlang zo lo an awm a nih chuan training neih tir leh an ni ang a, a hranpa liau liauin exam an hmachhawn leh a ngai dawn a ni.

Aizawl-ah chuan Pu Henry C. Lalrawnkima, Dy. CEO & Nodal Officer kaihhruaina hnuaiah Govt. Hrangbana College-ah exam hi huaihawt a ni a. Lunglei Govt College-ah chhimlam district 4-te tan Pu Vanlalhmachhuana, Asst. CEO & Programme Officer kaihhruaina hnuaiah buatsaih a ni bawk.

He exam vil tur hian ECI chuan National Level Master Trainer 2 - Pu Atiq Ahmad Siddiqui, NLMT leh Dr. S. S. Reddy, NLMT - a rawn tir a, anni kaihhruaina hnuaiah tluang taka hun hman a ni.