Vawiin khan Irrigation & Water Resources changtu Minister Pu C.Lalrinsanga chuan Mizoram State Water Policy-2019 chu Chief Engineer Committee Room, Irrigation & Water Resources Department Office ah a tlangzarh.
Minister Pu C.Lalrinsanga chuan Mizoram State-in Water Policy a vawikhatna atana a nei ta chu ram tana chhinchhiahtlak, thil pawimawh a tling a ni, a ti a. He policy hian tui hlutna leh vawnhim a tul zia a tilang a, tu leh fate tana tui kan khawl loh chuan nakinah la kiam mai thei leh harsatna tawk thei kan nih dan min hriat tir a ni, a ti. Khawvel hmun thenkhatah leh India ram chhung ngeiah pawh tui mamawhna a sang a, tui inchuhna leh tui avanga harsatna a thleng thin, Minister chuan a ti a. Tlangram lo neih avangin leiin tui a hip theihna a tla hniam a, lei hnuaia tui lut a tlem chuan lui leh kawr tui a tlem lo thei lo tiin Mizoramah tun dinhmunah harsatna lian tham la thleng rihlo mahse water policy neih hi thil tul tak a ni tawh, a ti. Tun atangin tui renchem kawngah inzirtir nasat a tul a, lo neih dan kalphung kan thlak loh chuan kan hmabak a eng vak lo a ni, I&WRD Minister chuan a ti bawk.
Mizoram State Water Policy-2019 siam tur hian India-German Cooperation hnuaiah GIZ (German company) mithiamte kaihhruainain IORA Ecological Solutions Pvt. Ltd., Delhi ten an siam a. He policy duang tur hian State sawrkar pawhin Chief Secretary kaihhruaina hnuaiah Task Force a din a, he Task Force kaltlang hian Mizoram State Department hrang hrang - I&WRD, Public Health Engineering, Forests, Power and Electricity, Soil, Agriculture, Horticulture leh Fisheries Deparment-te nen inrawnkhawmna duan a ni.
National Water Policy hi kum 2008 ah duan niin kum 2012 ah ennawn a ni a. Chumi zul zui chuan state tinte hi Water Policy nei theuh tur sawrkar laipuiin a beisei angin Mizoram Water Policy hi buatsaih a ni. Mizorama tui kan neih ang ang - ruahtui, lui tui, lei hnuai tui (ground water) leh tui hna dang te tangkai leh mumal zawka hman a nih theihna tur leh rualkhai zawka tui mamawhte kan hmuh theih nan he Policy hi duan a ni.
Mizoram State Water Policy 2019 tlangzarhna programme hi I&WRD Secretary Pu Thlamuana’n a kaihhruai a. GIZ Regional Coordinatior Dr.Kenneth M.Pala leh IORA Ecological Solutions Vice President Dr.Sumana Bhattacharya ten Mizoram State Water Policy - 2019 chungchang sawi zauna hun an hmang a ni.
